मोरङ/ सामाजिक सुरक्षा भत्ता वितरणमा हुने गरेको असहजतालाई सहज बनाउनुपर्नेमा प्रदेश १ का सामाजिक विकास मन्त्री जयराम यादवले बताएका छन् । सामाजिक सुरक्षा भत्ताकै कारण जेष्ठ नागरिकलाई हेरिने दृष्टिकोणमा परिवर्तन आएकाले उनीहरुले पाउँदै आएको भत्ता वितरणलाई सहज बनाउनुपर्नेमा जोड दिए ।
राष्ट्रिय परिचयपत्र तथा पञ्जीकरण विभागले आज विराटनगरमा आयोजना गरेको सामाजिक सुरक्षा कार्यक्रमको प्रभावकारीतामा सरकार र नागरिकको भूमिका विषयक सार्वजनिक सुनुवाई कार्यक्रममा मन्त्री यादवले सामाजिक सुरक्षा भत्ताकै कारण परिवारबाट जेष्ठ नागरिकले माया पाएको बताए । उनले भने, ‘भत्ताकै कारण पनि छोरा–छोरीले समेत सम्मान गर्ने गरेको पाईएको छ ।’
मन्त्री यादवले अन्यको तुलनामा पूर्ण अपाङ्गता भएका व्यक्तिहरुले पाईरहेको सामाजिक सुरक्षा भत्ता बृद्धि गर्न आवश्यक रहेको बताए । यादवले नेपाली नागरिकको पहिचानका नाममा धेरै प्रमाण–पत्रले झन्झटिलो बनाएको पनि बताए । भुमीपुत्रहरुलाई खोजेर नागरिकता दिनुपर्ने बताउँदै उनले भूमीपुत्रहरु नागरिकता नपाएर पलायन हुनुपर्ने अवस्था आउन दिनु नहुनेमा जोड दिए ।
