_1693980289.gif "#")
धरान । राजनितिक दलहरुको दबाबमा घोषणा भएको धरानको लकडाउन स्थानीयको विरोधमा फिर्ता भएको छ ।
कुनै तयारी बिनै धरान उपमहानगरपालिकाले १० दिन लकडाउन घोषणा गरे पछि विहिबार देखिनै स्थानीय सहित धरानका व्यापारी व्यसायीहरुले विरोध गर्दै आएका थिए । गत सोमबार बसेको सर्वदलिय सर्वपक्षिय बैठकमै व्यापारी व्यवसायी तथा मजदुरहरुले लकडाउनको विकल्प खोज्नुपर्ने माग गरेका थिए । लामो समय देखिको लकडाउनले व्यापार व्यवसायनै ठप्प हुँदा गरिखाने वर्गको झन विजोक हुने भन्दै बुधबार स्थानीयले धरान उपमहानगरपालिकाका मेयर विरुद्धनै आन्दोलन गरेका थिए ।
चौतर्फी स्थानीय सरकार सहित लकडाउन गर्न सुझाव दिएका राजनितिक दल प्रति पनि स्थानीय आक्रोशित हुन थाले पछि लकडाउनको निर्णय फिर्ता भएको छ । सबैतिरबाट आलोचना हुन थाले पछि धरानका मेयर तिलक राई पनि आफ्नो निर्णय फिर्ता लिन बाध्य भएका हुन् । उनकै विरुद्धमा नाराबाजी हुन थाले पछि उनको अध्यक्षतामा विहिबार बसेको सर्वदलिय सर्वपक्षिय सहित सुरक्षा संयन्त्रको बैठकले लकडाउनको निर्णय फिर्ता लिएको हो ।
उपमहानगरपालिकामा विहिबार बसेको छलफलमा सबै क्षेत्रबाट विकल्प खोजिनुपर्ने सुझाव दिए पछि लकडाउन फिर्ता भएको यातायात व्यवसायी सरोज श्रेष्ठले बताए । छलफलमा समेत सहभागि भएका श्रेष्ठले सबै तिर बजार खोल्दा धरानमा मात्रै बन्द गर्दा संक्रमण नरोकिने भएकाले लकडाउनको विकल्प खोजिनुपर्ने सुझाव दिएको उनले बताए ।
उपमहानगरपालिकाले सुनसरी जिल्ला प्रशासन कार्यालयले जारी गरेको निषेधाज्ञा समेतको समिक्षा गर्दै कोरोना नियन्त्रणको उपाय लकडाउन मात्रै नभएकाले तत्काललाई अन्य उपायहरु अपनाउनु पर्ने सुझाव आएकाले लकडाउन नगर्ने निर्णय गरेको छ । तत्काललाई लकडाउनको स्वरुप परिवर्तन गरी एक हप्ता सम्म स्वास्थ्य मापदण्ड पालना गर्न गराउन अनुगमन गर्ने तथा सम्बन्धित निकायहरुलाई जिम्मेवार बनाउने समेत निर्णय गरेको छ । जिल्ला प्रशासनले लागु गरेको लकडाउनलाई पालना गराउन सबै पक्ष लाग्न पनि उपमहानगरपालिकाले आग्रह गरेको छ ।
