चुरे जोगाउने विषयबारे प्रदेश १ सरकारको धारणा आउनु पर्छ : सचेतक राई

विराटनगर । नेपाली कांग्रेस प्रदेश १ संसदीय दलका सचेतक सूयर्माराज राईले ढुंगागिटी निर्यात र चुरे संरक्षणको विषयमा प्रदेश सरकारले आफ्नो धारणा सार्वजनिक गर्नुपर्ने माग गरेका छन् ।

संघीय सरकारले बजेटमार्फत चुरेबाट ढुंगागिटी बालुवा उत्खनन् गरी निकासी गर्ने घोषणा गरेसंगै यसको चौतर्फी विरोध भईरहेको छ । प्रदेशसभाको मंगलबार बसेको बैठकमा सचेतक राईले चोरी उत्खनन्को विषयमा आफूले बारम्बार सदनमा कुरा उठाएको तर प्रदेश सरकारले यस विषय गम्भीर नभएको बताए ।

भने,“अहिले एमाले नेतृत्वकै सरकारले चुरे विनास हुने प्रस्ताव ल्याएको छ । यसलाई स्विकार गर्न सकिदैन ।” चुरेको विषयमा प्रदेश २ सरकारले आफ्नो धारणा सार्वजनिक गरिसकेको अवस्थामा प्रदेश १ सरकारको बाटो के हो भन्ने तय हुनुपर्ने बताए ।

“बजेट भाषणसंगै चुरे उत्खनन् गरी ढुंगागिटी बालुवा भारततर्फ निकासी गर्ने अनि व्यापार घाटा काम गर्ने कुरा आयो । त्यो घर डढाएर खरानी बेच्ने सपना देखेको जस्तै हो,” राईले भने,“सरकार यसको वहुआयामिक समस्या के हुन्छ भन्नेमा प्रस्ट छैन ।

चुरे दोहनले परेको प्रभावको म पनि एउटा पीडित छु । पहिले २५ फिटमा पानी आउँथ्यो आज ३ सय फिट खन्नुपर्ने अवस्था आएको छ । यसलाई नियन्त्रण र संरक्षण गर्नुपर्नेमा सरकारको बुद्धि आयोस ।” उनले यस विषयमा प्रदेश १ सरकारको धारणा के हो ? भन्दै प्रश्न गरे ।

राईले चुरे संरक्षण गर्ने अनि ढुंगागिटीको अवैध उत्खनन् र चोरी निकासी रोक्न साझा संकल्पको प्रस्ताव ल्याउन सरकार समक्ष माग प्रस्ताव गरे । भने,“मानवका सन्ततीको भविष्य जोगाउनु पर्छ । सरकारले नै यसमा काम गर्ने हो ।”