इटहरीको मुक्तिघाटमा शव जलाउन नदिएपछि विवाद

इटहरी । कोरोना संक्रमणका कारण मृत्यु भएका ब्यक्तिको अन्तिम संस्कार गर्न इटहरीस्थित बुढि गंगा मुक्तिघाटमा स्थानीयले शव जलाउन नदिए पछि बिवाद चर्किएको छ ।

मुक्तिघाट संरक्षण समितिको आदेश भन्दै स्थानीयहरूले विगत एक साता देखि कोरोना संक्रमणबाट मृत्यु भएकाहरूको शव जलाउन दिइएका छैनन् । शव ब्यवस्थापनकै निमित्त निर्माण गरिएको घाटमा अन्तिम संस्कार गर्न नदिएपछि मृतकका आफन्तहरूले प्रहरी गुहार्नु परेको छ ।

केहि दिन अघि सप्तकोशि एफएमका स्टेसन म्यानेजर तथा स्वतन्त्र रेडियोको छाता संगठन ब्रोडकास्टिङ एसोसिएसन (बान)का अध्यक्ष चन्द्र न्यौपानेको संक्रमणकै कारण ज्यान गएको थियो । उनको शवलाई पनि घाटका संरक्षण समितिको आदेश भन्दै जलाउन दिइएको थिएन । केहि समयको चर्काचर्की र बिवाद पछि प्रहरीको उपस्थितिमा शव जलाइएको थियो ।

कोरोनाको कारण मृत्यु भएकाहरूलाइ घाटमा ल्याउन नदिन समितिले उर्दि नै जारी गर्दै रेखदेखका लागि मान्छे नै खटाएको छ । हावाको माध्यमबाट संक्रमण छिटो फैलन सक्ने भन्दै थप जोखिम हुने डरले कोरोना संक्रमितको शव जलाउन नदिएको घाटमा खटिएका स्थानीयहरू बताउँछन् ।

एक साता यता घाटमा कोरोना संक्रमितको शव ब्यवस्थापन गर्न दिइएको छैन । संरक्षण समितिले नै नदिएपछि अहिले बुढि घाटकै २५ मिटर पर खोला किनारमा शव ब्यवस्थापन गरिदै आएको छ ।

एक साता यता इटहरीमा नयाँ भेरियन्ट सहितको कोरोना संक्रमणबाट न्यौपाने सहित ३ जनाले ज्यान गुमाएका छन । जसमा न्यौपानेको मात्र घाटमा शव व्यवस्थापन भएको थियो बाँकी २ जनाको घाट देखि २५ मिटर पर खोला किनारमा व्यवस्थापन गरिएको छ ।

संक्रमणका कारण ज्यान गएकाहरूलाइ घाटमा शव जलाउन नलिनु मानवता हराएको भन्दै उपमहानगरपालिकाले भत्सर्ना गरेको छ । घाट संरक्षण समितिका अध्यक्ष हेम घिमिरे सँग छलफल गरी समस्या सामधान निकालिने इटहरीकी उपमेयर लक्ष्मी गौतमले बताईन ।