धरान/ एन्फा एकेडेमी धरानले आफ्नो पाँचौं ब्याचका तेस्रो वर्षका खेलाडीहरूलाई खेलकुद सामग्री वितरण गर्दै युवा फुटबल खेलाडीहरूको मनोबल बढाएको छ।
एकेडेमीको सभाहलमा आयोजित विशेष कार्यक्रममा ३० भन्दा बढी खेलाडीहरूलाई खेल पोशाक तथा आवश्यक खेल सामग्री हस्तान्तरण गरिएको हो।
एन्फाका केन्द्रीय वरिष्ठ मानार्थ उपाध्यक्ष तथा कोशी प्रदेश फुटबल संघका अध्यक्ष किशोर राई को सभापतित्वमा सम्पन्न कार्यक्रममा कोशी प्रदेश खेलकुद विकास बोर्डका नवनियुक्त सदस्य सचिव विप्लव घोष प्रमुख अतिथिका रूपमा सहभागी हुनुभएको थियो।
कार्यक्रममा कोशी प्रदेश खेलकुद विकास बोर्डका उपाध्यक्ष वसन्त अर्याल, सुनसरी जिल्ला फुटबल संघका अध्यक्ष नवीन राई, नेपाल क्रिकेट संघका केन्द्रीय सदस्य अर्जुन पौडेल लगायत खेलकुद क्षेत्रका विभिन्न व्यक्तित्वहरूको उपस्थिति रहेको थियो।
प्रमुख अतिथि विप्लव घोषले खेलकुदको विकासमा कोशी प्रदेश सरकार र खेलकुद विकास बोर्ड सधैं सकारात्मक रहेको बताउँदै खेलाडीहरूलाई गुणस्तरीय प्रशिक्षण र अवसर उपलब्ध गराउन विशेष योजना अघि बढाइने प्रतिबद्धता व्यक्त गर्नुभयो।
सभापति किशोर राईले एन्फा एकेडेमी नेपाली फुटबलको भविष्य निर्माण गर्ने थलोका रूपमा स्थापित भइरहेको उल्लेख गर्दै दक्ष खेलाडी उत्पादनमा एकेडेमीको योगदान महत्वपूर्ण रहेको बताउनुभयो।
कार्यक्रममा बोल्ने अन्य अतिथिहरूले नेपाली फुटबललाई अझ व्यवसायिक बनाउनुपर्ने, खेलाडीहरूको भविष्य सुनिश्चित गर्नुपर्ने तथा खेलकुद नीतिमा समयानुकूल सुधार आवश्यक रहेको धारणा राखे।
उनीहरूले नेपाली फुटबलले भविष्यमा विश्वकप खेल्ने सपना देख्नुपर्ने र त्यसका लागि आधार तहदेखि नै योजनाबद्ध तयारी आवश्यक रहेको बताए।
सो अवसरमा प्रमुख अतिथि तथा अन्य अतिथिहरूले एकेडेमीका खेलाडीहरूलाई खेल सामग्री वितरण गरेका थिए। सामग्री पाएपछि युवा खेलाडीहरू उत्साहित देखिएका थिए।
कार्यक्रमकै अवसरमा कोशी प्रदेश खेलकुद विकास बोर्डका उपाध्यक्ष वसन्त अर्याल तथा नवनियुक्त सदस्य सचिव विप्लव घोषलाई दोसल्ला ओढाएर सम्मानपत्रसहित विशेष सम्मान गरिएको थियो।
कार्यक्रमको सञ्चालन युवराज अधिकारीले गर्नुभएको थियो।
