इटहरी/ विश्व बालश्रम विरुद्ध दिवसको अवसरमा मोडर्न प्रिपरेटरी सेकेन्डरी बोर्डिङ स्कुलको सभाहलमा चेतनामूलक कार्यक्रम सम्पन्न भएको छ।
विद्यालयको आर्ट एन्ड लिटरेचर क्लबको आयोजनामा सम्पन्न कार्यक्रममा विद्यार्थीहरूले बालश्रमविरुद्ध जनचेतना फैलाउने उद्देश्यका साथ कविता, कथा, निबन्ध तथा प्रेरणादायी भनाइहरू प्रस्तुत गरेका थिए।
सहभागी विद्यार्थीहरूले सिर्जनात्मक प्रस्तुतीमार्फत बालअधिकारको संरक्षण र बालश्रम अन्त्यको आवश्यकताबारे सन्देश दिएका थिए।
कार्यक्रमको अध्यक्षता क्लबकी अध्यक्ष दृष्टि सिग्देलले गरेकी थिइन् भने श्रेजा गौतम र मिनाक्षी अधिकारीले संयुक्त रूपमा कार्यक्रम सञ्चालन गरेका थिए।
कार्यक्रममा बोल्दै विद्यालयका प्राचार्य पद्मराज सापकोटाले बालश्रमलाई दासप्रथाको आधुनिक रूपका रूपमा व्याख्या गर्दै यसको अन्त्यका लागि समाजका सबै पक्ष सचेत हुनुपर्ने बताए।
उनले बालश्रम अझै पनि विभिन्न स्वरूपमा समाजमा विद्यमान रहेको उल्लेख गर्दै यस्ता चेतनामूलक कार्यक्रमहरूले सामाजिक जागरण अभिवृद्धि गर्न महत्वपूर्ण भूमिका खेल्ने धारणा व्यक्त गरे।
प्राचार्य सापकोटाले प्रत्येक नागरिक सचेत र जिम्मेवार नभएसम्म बालहिंसामुक्त तथा बालश्रममुक्त समाज निर्माण सम्भव नहुने बताउँदै बालअधिकार संरक्षणका लागि सबैको साझा प्रयास आवश्यक रहेकोमा जोड दिए।
कार्यक्रमको अन्त्यमा बालश्रम अन्त्यका लागि सामूहिक प्रतिबद्धता व्यक्त गर्दै सहभागीहरूले यस्ता जनचेतनामूलक गतिविधिलाई निरन्तरता दिनुपर्ने आवश्यकता औंल्याएका थिए।
