नगरपालिकाले बजारीकरण गरीदिए पछि हौसिए कृषक

मोरङ । कृषकले उत्पादन गरेका कृषिजन्य उत्पादनहरु बजारीकरण नगरपालिकाले गरीदिन थालेपछि कृषि प्रति आकर्षण बढ्न थालेको छ ।

मोरङको बेलबारी नगरपालिकाले नगर क्षेत्रका कृषकले उत्पादन गरेको अन्नबालि, तरकारी, फलफुललगायतका उत्पादनहरु बजारीकरण गरीदिए पछि कृषकहरु कृषि प्रति हौसिएका हुन् ।

नगरपालिकाले निषेधाज्ञाको समयमा कृषकहरुलाई धानको विउँ बितरण गरेको छ । २० हजार किलो धानको विउँ ५० प्रतिशत अनुदानमा बितरण गरेको हो । बितरण गरीएको बिउँले करीब ५ सय बिगाहा क्षेत्रफलमा खेतिगर्न सकिने कृषि शाखाका प्राविधिक बताउँछन ।

राधा १२, कान्छी मन्सुली, बहुगुणि, स्वर्णसव १, रंजित लगायतका प्रजातिका धानका विउँ बितरण गरीएको छ । ३ हजार किलो मुल बिउँ बितरण गरीएको हो । मुल बिउँ उत्पादन पछि पुनः बिउँको रुपमा प्रयोग गर्न मिल्ने कृषि बिकास शाखाका प्रमुख बिनोद दाहालले बताए ।

उत्पादन भएका बस्तुहरुको बजारीकरणले हौसला मिलेको बेलबारीका पुराना किसान कबिन्द्र धिमालले बताए । एक वडा एक उत्पादनमा जोड दिएको नगरपालिकाले कृषिमा आत्मनिर्भर बनाउन तरकारी, फलफुल, कृषि औजारहरु समेत बितरण गरेको जनाएको छ । नेपाल कृषि अनुसन्धान परिषद तरहरा सुनसरी बाट बिउँ ल्याएर बितरण गरेको हो ।

यस अघि नगरपालिकाले किसानले उत्पादन गरेको गहुँ बजार भाउ भन्दा बढी मूल्यमा किनबेच गराइदिएको थियो । किसानलाई ८० प्रतिशत छुटमा करिब १ हजार किलो बिउँ वितरण गरेको थियो । बजारमा १२ सय प्रतिमनले गहुँ किनबेच भइरदाँ किसानले भने प्रति मन १५०० रुपैयाँ पाएका छन ।

६ हजार किलो गहुँ नगरपालिकाकै गाडीमा बजारसम्म पु¥याइदिएको छ । कृषकको उत्पादन बजारीकरण नगरपालिकाले आफै गरीदिने नगर प्रमुख ज्ञानेन्द्र सुवेदीले बताए । उनले उत्पादन भएका बस्तुहरुको बजारीकरण अन्तराष्ट्रिय बजारमा पनि गर्न थालिएको बताए ।