एक महिनादेखि सचिव विहीन वडा

इटहरी / मोरङको सुन्दरहरैंचास्थित एक नं वडा कार्यालयमा बिगत एक महिना देखि वडा सचिव नहुँदा दैनिक काम कार्वाहीहरू प्रभावित बनेका छन । सचिवको कोशी करीडोर अन्तरगत बिराटनगर सरूवा भएर गएपछि वडा फागुन देखि सचिव विहीन हुन पुगेको हो ।

वडा सचिव कार्यालयमा नभएपछि दैनिक जसो आवश्यक पर्ने कामहरू सबै प्रभावित भएका छन भने बालबालिकाहरूको जन्म दर्ता, बिवाह दर्ता, मृत्युदर्ता लगायत योजना सम्बन्धिका कामहरू प्रभावित भएको वडाका कर्मचारीहरूले बताएका छन ।

कार्यालयमा सचिव नहुदा सेवाग्राहीहरूलाइ पर्न गएको असुविधाको विषयमा पटक पटक नगर प्रमुख शिव ढकाल सँग गुनासो गरे पनि वेवास्था गरिएको वडाका जनप्रतिनिधिहरू बताउँछन् । मेयर ढकालले चाडै समस्या समाधान हुने प्रतिबद्धता जनाए पनि एक महिना बितिसक्दा समेत कुनै प्रक्रिया अघि नबढेको वडा सदस्य उत्तम
खवासले बताए ।

उनका अनुसार दैनिक ५० देखि १ सय जना सेवाग्राहीहरू वडा कार्यालयबाट सेवा नलिइ फर्कन बाध्य छन् । दैनिक जसो आउने जन्म दर्ता, बिवाह दर्ता तथा मृत्यु दर्ता र बसाइ सराइ दर्ता देखि विकासका योजनाका सबै कामहरू प्रत्यक्ष प्रभावित भएको उनको भनाई छ । वडामा सचिव नहुँदा उत्पन्न समस्याबारे नगरपालिकामा कुरा राखिसकेको तर समस्या सामधान गर्ने तर्फ नगर प्रमुख गम्भिर नभएको वडाध्यक्ष बिनोद बस्नेतकोगुनासो छ ।

यता सुन्दरहरैचाका निमित्त प्रमुख प्रसाशकीय अधिकृत ध्रुव भण्डारीले वडा कार्यालयको गुनासो बारे आफुहरू गम्भिर भएको र अब केहि दिन भित्रै समस्या सामधान हुने प्रतिवद्धता जनाए । तत्काललाइ सुन्दरहरैंचा ११ न वडाका वडा सचिवलाइ नै एक नं पनि पठाउने तयारी भइरहेको र केहि दिन भित्रै उनले त्यस वडामा पनि काम सुरू गर्ने बताए ।