_1693980289.gif "#")
विराटनगर: माघको कठ्याङ्ग्रिँदो जाडोमा मोरङको दक्षिणी क्षेत्रमा धान रोपाइँ सुरु भएको छ ।
खेत हिल्याउने, बीउ काढ्ने र रोपाहारले धान रोप्ने गरेको दृश्य अहिले मोरङको सुनवर्षी क्षेत्रमा देख्न सकिन्छ ।
रङ्गेली नगरपालिका-६ का मधुवनी चोक, ननकार टोल र सुनवर्षी नगरपालिका–५ को झिङ्गी टोलमा वर्षैपिच्छे माघको मध्यमा रोपाइँ हुन्छ ।
ती क्षेत्रका किसानलाई अहिले धान रोप्ने व्यस्तता छ । माघको कठ्याङ्ग्रिँदो जाडोमा धान रोप्न महिलाहरू बिहानै मेलोतिर निस्कने गर्छन् । मानौ मुखिया धान रोप्न बिहानै देत पुग्छिन् ।
विगतमा पनि उनले माघमा धान रोप्ने गरेकी थिइन् । ‘मजदुरी गर्न जाडोको परवाह नगरी जाने गरेकी छु’, उनले भनिन्, ‘गाउँघरमा अहिले त्यति धेरै काम पाइँदैन तर धान रोपाइँ सुरु भएकोले केही दिन भने रोपाहारका रूपमा बोलाएका छन् ।’
सुमित्रा ऋषिदेवले पनि धान रोपेर आउने पैसाले चारजनाको परिवारलाई चाहिने खाद्यान्न किनमेल गर्न मद्दत पुग्ने बताइन । भनिन्, ‘माघमा पनि कहीँ रोपाइँ हुन्छ भन्दै मान्छे छक्क पर्छन् तर हामीलाई धान रोप्न भ्याई नभ्याई छ ।’
किसानहरूका अनुसार यो क्षेत्रमा माघमा रोपेको धान जेठ महिनामा काट्ने गरिन्छ । असारमा फेरि बर्खे धान लगाइन्छ । माघमा लगाइने धानको उत्पादन राम्रै हुने गरेको छ । कृषि ज्ञान केन्द्रका अनुसार मोरङ प्रदेश १ मै अधिक धान उत्पादन हुने जिल्लामध्ये एक हो ।
