विराटनगर÷ सरकारले मोरङको सुन्दरहरैँचा नगरपालिकामा सरुवा रोग उपचार अस्पताल सञ्चालन गर्ने तयारी थालेको छ । संस्कृति, पर्यटन तथा नागरिक उड्डयन मन्त्री भानुभक्त ढकालले सोमबार अस्पताल शिलान्यास गरेका छन् ।
अस्पताल ५० शैय्याको प्रादेशिक स्तरको हुने मन्त्री ढकालले जनाए । सुन्दरहरैँचा–११ मा अस्पताल निर्माण हुनेछ ।
सरुवा रोगको उपचार गर्न प्रादेशिक अस्पतालको आवश्यकता महसुस भइरहेको सन्दर्भमा सुविधासहितको अस्पताल निर्माणको थालनी गरिएको मन्त्री ढकालले बताए । उनले अस्पतालबाट मोरङसहित प्रदेश १ भरिका नागरिकलाई सहयोग पुग्ने बताए ।
प्रदेश सरकारका सामाजिक विकास मन्त्री हिक्मत कार्कीले मोरङको पूर्वी क्षेत्रमा एउटा सुविधा सम्पन्न अस्पतालको आवश्यकता विगतदेखि नै हुँदै आएकोमा यो अस्पताल निर्माणले स्थानीयलाई उपचारमा सहज हुने धारणा राखे । ‘अस्पताल निर्माणले सरुवा रोग उपचारमा अन्यत्र धाउनुपर्ने समस्या निराकरण हुनेछ ।’ उनले भने ।
सामाजिक विकास मन्त्रालयले आयोजना गरेको कार्यक्रमको सहआयोजक धरानको वीपी कोइराला स्वास्थ्य विज्ञान प्रतिष्ठान रहेको थियो ।
वीपी प्रतिष्ठानको स्वामित्वमा रहेको १४ बिघा क्षेत्रफलमा सङ्घीय सरकारको ५० करोड रुपैयाँको लगानीमा यो अस्पताल निर्माण हुनेछ ।
