धरानका विद्यालयको वार्षिक शुल्क न्युनतम ३ हजार देखि ७ हजार सम्म

धरान । कोरोनाको महामारीको समयको धरानका निजी तथा संस्थागत विद्यालयहरुको वार्षिक शुल्क निर्धारण भएको छ ।

धरान उपमहानगरपालिकाका मेयर तिलक राईले निजी तथा सामुदायिक विद्यालयका संचालक लगायत अभिभावकहरु सँग गरेको छलफल पछि बार्षिक शुल्क न्युनतम ३ हजार र अधिकतम ७ हजार रुपैया तोकिएको छ भने असोज महिनादेखि मात्र गत बर्ष कायम भएको शुल्क लिन पाउने निर्णय भएको छ ।

बुधबार धरान उपमहानगरपालिकाले दुवै पक्षबिच छलफल गरेपश्चात मेयर राईले मेयरस्तरीय निर्णय गर्दै आपसी सहमती भए अनुसार मासिक तथा बार्षिक शुल्क कायम गर्ने, सहमति वा समझदारी नभएको खण्डमा उपमहानगरले तोके वमोजिमको हुने निर्णय भएको शिक्षा महाशाखाले जनाएको छ ।

उपमहानगरका अनुसार निजी विद्यालयहरुले लिने मासिक शुल्क असोज महिनादेखि गत बर्ष कामय भएको शुल्क मात्र लिन पाउने निर्णय गरिएको छ । असोज महिना भन्दा अघि अनलाइन कक्षा सञ्चालन गरेका विद्यालयहरुले अनलाइन कक्षामा सहभागी भएका विद्यार्थीहरुबाट मात्र मासिक शुल्कको आधा (पचास प्रतिशत) मात्र लिन पाउने निर्णय गरिएको छ ।

गत बर्ष बार्षिक शुल्क ६ हजारसम्म भएको हकमा चालु बर्षमा ५० प्रतिशत अर्थात ३ हजार मात्र लिन पाउने निर्णय भएको छ । तीन हजार भन्दा कम बार्षिक शुल्क लिने विद्यालयहरुले गत बर्ष लिने गरेको बार्षिक शुल्क रकम बराबरी मात्र लिने निर्णय भएको छ ।

यस्तै, गत बर्ष ६ हजारभन्दा माथि ९ हजारसम्म बार्षिक शुल्क लिएका विद्यालयहरुले यो बर्ष ४० प्रतिशत मात्र शुल्क लिन पाउनेछन् भने ९ हजारदेखि १२ हजारसम्म गत बर्ष शुल्क लिने विद्यालयहरुले ३५ प्रतिशत शुल्क लिन पाउनेछन् ।यसैगरि, १२ हजारदेखि १५ हजारसम्म बार्षिक शुल्क लिने विद्यालयहरुले ३० प्रतिशत शुल्क लिन पाउनेछन् भने १५ हजारदेखि २८ हजारसम्म बार्षिक शुल्क लिने विद्यालयहरुले २५ प्रतिशत मात्र शुल्क लिन पाउने छन् ।