इलाम । नेकपाका अध्यक्षद्वयको आन्तरिक विवादका कारण पार्टी फुट्ने हल्ला चलिरहे पनि पूर्व प्रधानमन्त्री तथा नेपाल कम्यूनिस्ट पार्टी (नेकपा) का नेता झलनाथ खनालले कुनैपनि हालतमा पार्टी नफूट्ने दाबी गरेका छन् ।
प्रचण्ड निकट देखिएका खनालले पार्टी भित्र अन्तरसंघर्ष र बहस चलिरहे पनि ७१ वर्षको संघर्षले एकता भएको पार्टी कुनै पनि हालतमा नफुट्ने दाबी गरेका हुन् । इलामको सूर्योदय नगरपालिकामा निर्माण भएको अस्पतालको शिलान्यास र आँखा उपचार केन्द्रको उद्घाटन गर्दै उनले भने, ‘अहिले पार्टी अत्यन्त महत्वपूर्ण घडिबाट अघि बढिरहेको छ, अन्र्तसंघर्ष छन, आन्तरिक बहस चलिरहेका छ, यसले समस्या समाधान गराएर देशलाई तिब्र विकास गरेर लैजान्छ ।
बहस र छलफल बाट समस्या समाधान गरेर पार्टी झन बलियो बन्ने बताउँदै नेता र कार्यकर्तालाई पार्टीको निति नियम अनुसार अघि बढ्न आग्रह गरेका छन । उनले भने, ‘कतिपय नेताको सोच र दृष्टिमा भिन्नता भएको कारण अहिले समस्या आएको छ, ७१ वर्षको संघर्षले बनेको नेकपालाई समृद्घ बनाई सरकारलाई लोकप्रिय बनाउन लाग्नुपर्ने समय आएको छ ।’
फरक प्रसंगमा खनालले देशका सबै पालिकामा स्वास्थ्य पूर्वाधारको विस्तार गर्न महत्वपूर्ण कदम चालेको बताउँदै वर्तमान सरकारले नयाँ कामको थालनी गरेको बताए । उनले भने, ‘विश्वमा महामारीका रुपमा कोभिड १९ फैलिरहेको बेला देश व्यापी रुपमा अस्पताल निर्माण हुनुले स्वास्थ्य क्षेत्रको विकास भएको छ, यसबाट बँच्न सबैले स्वास्थ्य मापदण्डको पालना गरेर अघि बढ्नु पर्छ ।’
स्वास्थ्य, शिक्षा सबैभन्दा ठूलो सम्पति रहेकाले यसको विकासले सुखी नेपाली समृद्घ नेपाल बनाउन सहयोग पुग्ने हुँदा विकास सँगै गाउँ गाउँमा सडक र विजुली पुर्याउन लागि परिरहेको र धेरै ठाउँमा काम भईरहेको उनको भनाई छ ।