_1693980289.gif "#")
विराटनगर । प्रदेश १ मा तीव्र गतिमा फैलिरहेको कोरोनाको संक्रमण मुख्यत मोरङमा केन्द्रीत भएको तथ्यांकले देखाएको छ ।
परीक्षण भई कोरोना पोजेटिभ भएकाहरुको तथ्यांकले संक्रमण मोरङ र त्यसमा पनि प्रदेश राजधानी विराटनगर केन्द्रीत भएको देखिन्छ ।
प्रदेश सरकार मुख्यमन्त्री तथा मन्त्रिपरिषद् कार्यालय मातहतको कोरोना सूचना डेस्कको पछिल्लो तथ्यांकअनुसार प्रदेशभर कूल संक्रमितको संख्या १९ हजार ७९१ पुगिसकेको छ । तीमध्ये मोरङमा मात्र संक्रमितको संख्या ९ हजार ३५२ जना छ । जिल्लामा कोरोना संक्रमणबाट ७० जनाले ज्यान गुमाई सकेका छन ।
प्रदेशको आंकडा हेर्दा कूल संक्रमितमध्ये ४७ दशमलब २५ प्रतिशत मोरङका छन । मोरङमा ५ हजार ६४१ ज्ना डिस्चार्ज भएका छन भने ३ हजार ६४१ सक्रिय संक्रमित छन ।
मोरङ पछि संक्रमितको संख्या सुनसरीमा धेरै छ । जिल्लाका कूल ६ हजार ५२९ संक्रमितमध्ये ३ हजार ७७३ जना डिस्चार्ज भईसकेका छन । अब संक्रमितको संख्या ३ हजार ६९० जना छ । सुनसरीमा संक्रमणबाट हालसम्म ६६ जनाले ज्यान गुमाईसकेका छन ।
झापामा सक्रिय संक्रमितको संख्या १ हजार ८४ जना छ । जिल्लामा कूल २ हजार २९८ जनामा संक्रमण देखिएकोमा १ हजार १८२ जना डिस्चार्ज भईसकेका छन । मृतकको संख्या ३२ पुगेको छ । प्रदेश १ मै पहिलो पटक कोरोना देखिएको उदयपुर जिल्लामा २२४ जनामा कोरोना संक्रमण देखिएको छ । १९५ जना डिस्चार्ज भई हाल सक्रिय संक्रमितको संख्या १२५ जना छ । उदयपुरमा कोरोना संक्रममणबाट हालसम्म दुई जनाले ज्यान गुमाएका छन । प्रदेश राजधानी विराटनगरका कोरोना संक्रमितको संख्या ५ हजार ३३१ जना पुगेको छ ।
प्रदेशका पहाडी र हिमाली जिल्लाहरुमा तुलनात्मक रुपमा कम कम संक्रमण देखिएको छ । कतिपय जिल्लाहरुमा आउजाउमा समेत पालिकाहरुले कडिकडाउ गरेका कारण संक्रमण गाउँस्तरसम्म पुगेको छैन ।
