धनकुटामा जारी निषेधाज्ञा केही खुकुलो बनाउँदै

धनकुटा, १७ भदौं / धनकुटामा जारी निषेधाज्ञा केही खुकुलो बनाउँदै भदौं २२ गते राति १२.०० बजेसम्मलाई थप गरिएको छ ।
भदौं ११ गतेदेखि जारी गरिएको निषेधाज्ञा तेस्रो पटक थप गरिएको हो ।

कोरोना भाइरसको परिक्षण गर्ने क्रममा भदौ १३ गते कोभिड–१९ को पिसिआर परिक्षणको नतिजा अनुसार धनकुटामा १३ जना प्रहरी सहित १९ जनामा संक्रमण देखिएको थियो । उनीहरुको कन्ट्राक्ट ट्रेसिङमा रहेकाहरुको पिसिआर परिक्षण रिपोर्ट आउन बाँकी रहेकाले पाँच दिनको लागि निषेधाज्ञा थप गरिएको प्रमुख जिल्ला अधिकारी केशव प्रसाद विमलीले बताए । निषेधाज्ञाको समय थप गरिएसँगै केही खुकुलो पनि पारिएको छ ।

१९ जना संक्रमितहरु भने अहिले धनकुटाको औद्योगिक ग्राममा स्थापना गरिएको आइसोलेसनमा रहेका छन् ।
यस अघि लागु गरिएको निषेधाज्ञामा दैनिक बिहान ७.०० बजेदेखि १०.०० बजेसम्म मात्र पसल खुल्ला गरिएको थियो । तर डिसीसीएमसीको आज बसेको बैठकले सर्वसाधारणको आवश्यकतालाई मध्यनजर गर्दै दैनिक बिहान ७.०० बजेदेखि १०.०० बजेसम्म र साँझ ५.०० बजेदेखि ७.०० बजेसम्म दैनिक उपभोग्य खाध्य सामग्रीहरुको पसल स्वास्थ्य प्रोटोकलको पालन गर्दै खरिद विक्री गर्न पाउने व्यवस्था गरिएको प्रमुख जिल्ला अधिकारी विमलीले बताए ।

यो समयमा औषधी पसल बाहेकका कुनै पनि पसलहरु तोकिएको समय बाहेक खुल्ला रहने छैनन् ।

त्यस्तै सरकारी कार्यालयहरु सकेसम्म विधुतीय माध्यमद्धारा वा ५० प्रतिशत कर्मचारीलाई सहभागी गराएर संचालन गर्न पाउने छन् भने वित्तिय संस्था तथा बैकहरु विधुतीय सेवा बाहेक अन्य गर्न नपाउने निर्णय गरिएको छ ।

यता सर्वसाधारणलाई नागरिकहरुलाई अत्यावश्यक काम बाहेक पूर्णरुपमा निषेध गरिएको छ भने अन्य कर्मचारीहरुलाई सम्बन्धित कार्यालयको कार्ड लगाएर मात्र हिड्डुल गर्न व्यवस्था गरिएको छ ।