धरान । कोरोनाको संक्रमण फैलिदै गएको अवश्थामा प्रदेशका विभिन्न स्वास्थ्य संस्थाहरुबाट बिरामी रिफर भएर आउने क्रममा धरान स्थित वीपी कोइराला स्वास्थ्य विज्ञान प्रतिष्ठान सँग समन्वय नहुँदा बिरामीले सास्ती भोग्नु परेको छ ।
प्रतिष्ठानमा अन्य उपचारका लागि आउने बिरामीको सँख्या पनि बढिरहेको अवश्थामा कारोना संक्रमित बिरामीहरु समन्वय नगरी अन्य शहरका स्वास्थ्य केन्द्रहरुले पठाउने गरेका कारण प्रतिष्ठानले व्यवस्थापन गर्न कठिनाई भएको छ ।
समन्वयको अभावमा बिरामीले समस्या भोग्नु परेका कारण बाहिरी जिल्लाबाट आउने कोरोना संक्रमणका बिरामीहरुलाई प्रतिष्ठान सँग समन्वय गरेर मात्रै पठाउन प्रतिष्ठानले आग्रह गरेको छ ।
बुधबार प्रेस विज्ञप्ती जारी गर्दै प्रतिष्ठानले संक्रमितहरु सिधै अस्पताल आउँदा व्यवस्थापनमा कठिनाई रहेको बताउँदै प्रतिष्ठानले तोकेको समन्वयकर्ता सँग समन्वय गरी मात्रै बिरामी पठाउन आग्रह गरेको छ । प्रतिष्ठानका प्रवक्ता डा. निदेश सापकोटाद्वारा हस्ताक्षरित विज्ञप्तीमा समन्वयको अभाव बारम्बार दोहोरिन गएकाले सम्पर्क गरेर मात्रै बिरामी पठाउन उल्लेख गरिएको छ । विज्ञप्तीमा लेखिएको छ, ‘दिनहुँ जसो संक्रमित सँख्या बढिरहेको परिप्रेक्षमा संक्रमितहरु विभिन्न क्वारेन्टाईन, होल्डिङ सेन्टर र अस्पतालबाट आईनै रहनु हुन्छ, कतिपय ठाउँबाट हाम्रो समन्वयकर्ता सँग सम्पर्क नगरी संक्रमितलाई सिधै अस्पताल पठाइ दिने र अस्पतालमा वहाँहरुलाई राख्ने शैया खालि नहुँदा संक्रमितले घण्टौं कुर्नु पर्ने हुन जान्छ, त्यसैले समन्वय गरेर मात्रै बिरामीलाई पठाउन आग्रह गरिएको छ ।’