सुनसरी जिल्लामा २६ गते सम्म निषेधाज्ञा घोषणा (विज्ञप्ति सहित)

धरान । समुदाय स्तरमै कोरोना संक्रमण फैलिन थाले पछि सुनसरीको जिल्ला सुरक्षा समितीको बैठकले साउन २६ गते सम्मका लागि निषेधाज्ञा जारी गरेको छ ।

जिल्ला प्रशासन कार्यालय सुनसरीका प्रमुख फणिन्द्रमणी पोखरेलको अध्यक्षतामा बुधबार बसेको बैठकले राती १२ बजे देखि साउन २६ गते राती १२ सम्मको लागि निषेधाज्ञा जारी गरेको हो ।

निषेधाज्ञाभर बजार, पसल, यातायातका साधन पूर्णरुपमा बन्द हुने र सर्वसाधारणलाई समेत घरबाट बाहिर हिँडडुल गर्न प्रतिबन्ध लगाइएको छ । सुनसरीका इटहरी, इनरुवा, दुहबीले मंगलबार राती देखि नै लकडाउन घोषणा गरिसकेका छन् भने धरानले बुधबार राती देखि लकडाउन शुरु गर्ने निर्णय गरेको थियो । स्थानीय तहले घोषणा गरेको लकडाउनलाई अझ कडा बनाउन निषेधाज्ञा जारी गरिएको प्रमुख जिल्ला अधिकारी पोखरेलले बताए ।

सुनसरीको धरान, इटहरी, दुहबी, इनरुवा लगायतका स्थानमा कोरोना संक्रमितको संख्या दैनिक बढ्दै गए पछि जिल्लावासीलाई कोरोनाबाट सुरक्षित बनाउन निषेधाज्ञा जारी गरेको जनाइएको छ ।