ट्यांकी निर्माणको नाममा शहीद स्मृति पार्कको लाखौंको संरचना भत्काइयो

बराहक्षेत्र । खानेपानी ट्यांकी निर्माणको नाममा शहीद स्मृति शान्ति पार्कले लगानी गरेको लाखौंको संरचना भत्काइएको छ । केन्द्रीय सरकारको लाखौंको लगानीमा निर्माण भएको कम्पाउण्ड वाल र साविक गाउँ विकास समितिले विनियोजन गरेको वार्षिक बजेटबाट निर्माण गरिएको संरचना भत्काइ खानेपानी ट्यांकी निर्माण गर्न थालिएको छ ।

सुनसरीको वराहक्षेत्र १ स्थित लालबस्तीमा निर्माणाधीन शहीद स्मृति शान्ति पार्क अतिक्रमण गरी स्थानीय तोरिबारी खानेपानी संस्थाले ट्यांकी निर्माण थालेको स्थानीयले गुनासो गरेका छन् । वर्षौंदेखि लगानी हुँदै आएको सरकारी रकम वालुवामा पानी हाले सरह भएको स्थानीयको गुनासो छ ।

तत्कालीन माओवादीले विकास गरेको लालबस्ती अगाडि शहीद स्मृति शान्ति पार्क निर्माण गर्ने उद्देश्यले साविक वराहक्षेत्र गा.वि.स. ले समेत आ.व. २०६६÷६७ देखि बजेट विनियोजन गर्दै आएको थियो । पार्क निर्माणका लागि तत्कालीन केन्द्रीय सरकारको शान्ति तथा पुनः निर्माण मन्त्रालयबाट समेत २२ लाख रुपैयाँ बजेट विनियोजन भएको थियो ।

विनियोजित बजेटबाट प्राविधिक स्टिमेट अनुसार कम्पाउण्ड वाल निर्माण कार्य सम्पन्न भइसकेको थियो । अन्य मुख्य संरचना निर्माण गर्न बाँकी रहेको अवस्थामा स्थानीय तोरीबारी खानेपानी संस्थाले निर्माणाधीन शहीद स्मृति तथा शान्ति पार्कको जग्गा अतिक्रमण गरी बनेको संरचना भत्काई निर्माण कार्य शुरु गरेको स्थानीयको भनाइ छ ।

खानेपानी ट्यांकी निर्माण गर्न विभिन्न विकल्प खोजी गर्न सकिए पनि निर्माणाधीन शान्ति पार्कलाई क्षतविक्षत गरी खानेपानीका लागि ट्यांकी निर्माण गरिएको शहीद परिवारका एक सदस्य डम्बरकुमार तुम्बाहाम्फेले बताए । ‘खानेपानी योजनाको यो कदमले शहीदहरुको अपमान गरेको हाम्रो ठहर छ ।’ तुम्बाहाम्फेले भने ।

गत असार १६ गते स्थानीय शहीद परिवारले जग्गा अतिक्रमण भइरहेकोमा रोकिदिन वराहक्षेत्र नगरपालिकाको न्यायिक समितिमा संयुक्त निवेदन पेश गरे पनि हालसम्म कुनै छलफल नगरिएको स्थानीय सुन्दर राईले बताए । राई भन्छन्, ‘हामीले वडामा पनि निवेदन हाल्यौं, नगरपालिकामा दियौं, खानेपानी सब डिभिजन कार्यालय सुनसरीमा समेत निवेदन ग¥यौं तर अहिलेसम्म कहिंकतैबाट समस्या समाधानका लागि छलफल समेत भएको छैन ।’

लकडाउनका कारण छलफल चलाउन नसक्दा ढिलाई भएको बराहक्षेत्र नगरपालिकाकी उपमेयर तथा न्यायिक समितीकी संयोजक कमला मगरले बताईन् । उनीहरु दुवै पक्ष बिच पनि केही कुरा बाँझेका कारण छलफल गराउने तयारीमा रहेको उनको भनाई छ । शुक्रबार देखि न्यायिम समितीमा आएका उजुरीहरु माथि छलफल शुरु भएकाले केही दिनमै शहिद स्मृति पार्क र खानेपानी टंकी निर्माणको विवादको विषयमा पनि छलफल हुने उनले बताईन् ।

यता खानेपानी उपभोक्ता समितीका अध्यक्ष डम्बर प्रसाद सिग्देलले भने शहिद स्मृति पार्कलाई संरक्षण नै गर्न खोजेको बताउँछन् । लामो समय देखि अलपत्र रहेको शहिद पार्कलाई संरक्षण गर्दै उनीहरुको सम्मान नै खोजेको उनले बताए । लथालिङग रहेको अवश्थामा बराहक्षेत्रवासीलाई खानेपानी टंकीको पनि आवश्यक्ता देखिएकाले २०७४ माघ १३ गते सर्वपक्षीय रुपमा छलफल गरि खानेपानी टंकी निर्माणको लागि सहमती जुटेको उनको भनाई छ । उनले भने, ‘शहिद पार्कलाई नमासिने गरि खानेपानी टंकी निर्माण गरिने, पार्कको नाम पनि पुरानै रहने, त्यहाँ शहिदहरुको सालिक निर्माण गरिदिने, शहिद परिवारलाई नै रोजगारीका लागि प्राथमिकता दिइने सहमती भएको छ ।’ पार्क स्थलमा खानेपानीको टंकी, चौकिदार भवन र शौचालय बाहेक पार्कलाई आकर्षण गराउने संरचना देखि अन्य संरचना निर्माण नगरिने पनि सम्झौतामा उल्लेख भएको बताए ।