मकै रोप्ने ५ वटा अत्याधुनिक मेसिन कृषकहरुलाई वितरण

धनकुटा/ धनकुटाको महालक्ष्मी नगरपालिकाले मकै पकटे क्षेत्र घोषणा गरेर मकै रोप्ने ५ वटा अत्याधुनिक मेसिन कृषकहरुलाई वितरण गरेको छ ।

कृषि ज्ञान केन्द्र धनकुटाको सहयोगमा नवज्योति बहुउद्देश्यीय कृषि सहकारी संस्था मार्फत महालक्ष्मी नगरपालिका–२ का कृषकहरुलाई नगरपालिकाले कमै रोप्ने ५ वटा अत्याधुनिक मेसिन सहित विभिन्न कृषि औजारहरु वितरण गरिएको नगर प्रमुख पर्शुराम नेपालले बताए । कृषकहरुलाई कृषिमा आर्कषित गर्दै कृषि उत्पादन बृद्धि गर्ने उद्देश्यले नगरका केही कृषि फर्म तथा कृषकहरुलाई १२ वटा मिनी टिलर, ५ वटा डिजिटल आधुनिक काँटा, ३ वटा स्प्रे र ३१ थान त्रिपाल वितरण गरिएको छ ।

परम्परागत कृषि खेती प्रणालीले श्रम बढी र उत्पादन कम हुने भएकाले कृषकहरुको आयआर्जनमा बृद्धि गर्दै आधुनिक खेतीतर्फ उन्मुख गराउन अहिले स्थानीय तहहरुले कृषकहरुलाई अत्याधुनिक मेसिनहरु खरिद गरेर वितरण गर्दै आएका छन् । सोही क्रममा नगरपालिकाले यसै चालु आर्थिक वर्षमा १२ वटा मिनी टिलर केही दिन भित्रमा वितरण गर्ने कार्यक्रम रहेको पनि नगर प्रमुख नेपालले बताए ।

यसैबीच धनकुटाको चौबिसे गाउँपालिकाले आधुनिक तरकारी खेतीलाई विस्तार गर्दै लैजाने उद्देश्यले कृषकहरुलाई प्लाष्टिकको टनेल ५० प्रतिशत मुल्य अनुदानमा वितरण गरेको छ । चालु आर्थिक वर्षको स्वीकृत कार्यक्रम अन्तरगत ५० प्रतिशत अनुदानमा प्लाष्टिकको टनेल खरिद गरी कृषक समुह र व्यक्तिगत फर्महरुले माग गरेको आधारमा वितरण गरिएको गाउँपालिकाका अध्यक्ष खजिन्द्र राईले बताए ।

चौबिसे गाउँपालिका तरकारीको पकेट क्षेत्र विस्तार गर्दै कृषकहरुको आयआर्जनमा बृद्धि गर्ने उद्देश्यले चालु आर्थिक वर्षको कार्यक्रम अनुसार ५ वटा कृषक समुह र ३ वटा व्यक्तिगत फर्महरुलाई ३५ वटा प्लाष्टिकको टनेल वितरण गरिएको गाउँपालिकाले जनाएको छ । उक्त प्लाष्टिकको टनेल कृषकहरुलाई गाउँपालिकामा नै सहभागी गराएर गाउँपालिकाका अध्यक्ष खजिन्द्र राई र उपाध्यक्ष यज्ञकुमारी रुचालले हस्तान्तरण गरेका थिए । गाउँपालिकाले आगामी आर्थिक वर्ष पनि यो अभियानलाई निरन्तरता दिने जनाएको छ ।