लेखनवृत्ति अनुदान वराहक्षेत्रका ४ सञ्चारकर्मीलाई

सुनसरी / वराहक्षेत्र नगरपालिकाले प्रत्येक वर्ष प्रदान गर्ने लेखनवृत्ति (फेलोसिप) स्थानीय ४ जना सञ्चारकर्मीलाई प्रदान गर्ने भएको छ ।

सुनसरी सामुदायिक एफएमको आयोजनामा स्थानीय सञ्चारकर्मीलाई प्रशिक्षणसँगै फेलोसिप प्रदान गरिने कार्यक्रम संयोजक विमला घिमिरेले जानकारी दिइन् ।

फेलोसिपमा सहभागीलाई दुई सेशनमा प्रशिक्षण प्रदान गरी फेलोसिप लेखनका लागि फिल्डमा पठाइने बताइएको छ । प्रशिक्षणको सहजीकरण जनता टिभीमा आबद्ध पत्रकार दिनेश गजमेर र स्थानीय पत्रकार सन्तोष गुप्ताले गर्नेछन् ।

फेलोसिपका लागि ‘वराहक्षेत्र नगरपालिकामा क्वारेन्टाइनको अवस्था’का विषयमा र ‘लकडाउनको अवस्थामा वराहक्षेत्रका सीमानाकाको अवस्था’का विषयमा न्युनत्तम १५ मिनेटको भिडियो फिचर तयार गर्नुपर्ने छ । अनलाइन वा पत्रपत्रिकाका लागि भने न्युनत्तम १००० शब्दको फिचर तयार गर्नुपर्ने छ ।

लेखनवृत्तिका लागि वराह टीभी अनलाइनमा आबद्ध सञ्चारकर्मी प्रदीप चौधरी, नयाँ अनलाइन डटकममा आबद्ध सञ्चारकर्मी प्रकाश राई, सुनसरी एफएममा आबद्ध विष्णुमाया पराजुली र स्थानीय सञ्चारकर्मी दीपक पुरी छनोट भएका छन् ।

फेलोसिपका लागि प्रतिव्यक्ति १० हजार रुपैयाँ प्रदान गरिने संयोजक घिमिरेले जानकारी दिइन् ।