ताप्लेजुङ आगलागिमा ७ घर र ५ वटा घुम्तीपसल ध्वस्त

ताप्लेजुङ।  शुक्रबार राती देखि आगलागीबाट ताप्लेजुङको सदरमुकाम फुङ्लिङमा ७ घर र ५ वटा घुम्ति पसल जलेर नष्ट भएको छ ।

शुक्रबार रातिदेखि लागेको आगो शनिबार बिहान ५ बजे मात्र आगो पुर्णरुपमा नियन्त्रणमा आएको थियो ।

आगलागीबाट फुङलिङ नगरपालिका ५ स्थित ट्याक्सी स्टेण्ड छेउमा रहेका ७ घर र ५वटा घुम्ती पसल जलेका थिए ।

नेपाली सेना, सशस्त्र प्रहरी, नेपाल प्रहरी, कर्मचारी र बासिन्दाले दमकलको सहायतामा आगो पूर्ण रूपमा निभाउन सफल भएका हुन् ।

आगलागीबाट स्थानीय नेत्र कार्की, खेम केसी, खड्ग थापा, चन्द्रमाया लोछार, राम साह, प्रेम निरौला र देवी भट्टराईको घर जलेर ध्वस्त भएका छन् भने बिनिता बिस्टको घुम्ती चिया पसल, तुलसा भट्टराईको चिया तथा किराना घुम्ती पसल, बिशाल काउण्टरको घुम्ती, सुपर साइनो काउण्टरको घुम्ती र बुद्ध शान्ति काउण्टरको घुम्ती जलेर नष्ट भएको छ ।

शुक्रबार राति साढे १० बजे देवी भट्टराईको घरमा रहेको भट्टराई होटल एण्ड लजबाट आगलागी शुरु भएको प्रहरीले जनाएको छ ।

आगो के कारणले लाग्यो ? तथ्य पत्ता लागिसकेको छैन । मध्यरातमा लजबाट शुरु भएको आगोले दायाँ बाँयाका अन्य घर, पसल र होटल समेत जलेको छ ।

आगो पूर्ण रुपमा निभाइएपछि प्रशासनले क्षति विवरण संकलन गर्न थालेको छ ।

आगलागीबाट कति रुपैयाँ बराराबरको धनमाल क्षति भयो ? यकीन भइसकेको छैन ।

आगलागीबाट क्षति पुगेका परिवारलाई तत्काल नगरपालिका र रेडक्रसले राहत उपलब्ध गराउने भएको छ ।

शनिबार बिहान बसेको सर्वपक्षीय छलफलले आगलागीमा परेको हातमुख जोड्नै समस्या भएका परिवारलाई राहत उपलब्ध गराउने निर्णय भएको प्रमुख जिल्ला अधिकारी डोरेन्द्र निरौलाले जानकारी दिए ।