धरान/ सुनसरीको इनरुवामा मलद्वारभित्र लागूऔषध लुकाएर ल्याउँदै गरेका दुई जना पक्राउ परेका छन्। उनीहरूको साथबाट १७.३५ ग्राम ब्राउन सुगर बरामद भएको छ।
जिल्ला प्रहरी कार्यालय सुनसरी र अस्थायी प्रहरी पोष्ट इनरुवा बसपार्कबाट संयुक्त रूपमा खटिएको प्रहरी टोलीले आइतबार दिउँसो ४ बजे इनरुवा नगरपालिका–४ स्थित बसचोकबाट उनीहरूलाई नियन्त्रणमा लिएको हो।
पश्चिमबाट पूर्वतर्फ पैदल आउँदै गरेका उदयपुरको बेलका नगरपालिका–४ निवासी ३२ वर्षीय नवीन राई र २९ वर्षीय सुमन राईलाई शंका लागेर प्रहरीले जाँच गरेको थियो।
जाँचका क्रममा नवीन राईको मलद्वारबाट लुकाएर राखिएको १७ ग्राम ३५० मिलिग्राम ब्राउन सुगर फेला परेको प्रहरीले जनाएको छ।
बरामद लागूऔषधसहित दुवै जनालाई नियन्त्रणमा लिएर जिल्ला प्रहरी कार्यालय सुनसरीमा ल्याइएको छ। घटनाबारे थप अनुसन्धान भइरहेको प्रहरीले जनाएको छ।
