सुनसरी/ वैदेशिक रोजगारीबाट फर्किएर व्यावसायिक च्याउ खेती सुरु गरेका बराहक्षेत्र नगरपालिका–११ मधुवनका रोशनप्रसाद गुप्ताले राम्रो आम्दानी गर्दै आएका छन्।
सात वर्ष वैदेशिक रोजगारीमा बिताएर स्वदेश फर्किएका गुप्ताले २०७७ सालमा भाइ भरतसँग मिलेर ५० हजार रुपैयाँ लगानीमा च्याउ खेती सुरु गरेका हुन्। विदेशमा कमाएको रकम स्वदेशमै लगानी गर्ने सोचले सुरु गरेको व्यवसायबाट अहिले सबै खर्च कटाएर वार्षिक १५ लाख रुपैयाँभन्दा बढी आम्दानी हुने गरेको उनले बताए।
च्याउ खेती सुरु गरेको वर्ष घाटा व्यहोर्नुपरे पनि पछिल्लो समय आम्दानी बढ्दै गएको गुप्ताको भनाइ छ। करिब छ कट्ठा क्षेत्रफलमा छ वटा टनेल निर्माण गरी च्याउ खेती गर्दै आएका उनको फार्ममा दैनिक २०० किलोभन्दा बढी च्याउ उत्पादन हुने गरेको छ। वार्षिक रूपमा ३० टनभन्दा बढी च्याउ उत्पादन गरी बजारमा बिक्री गर्दै आएको उनले जानकारी दिए।
उत्पादित च्याउ धरान, इटहरी, इनरुवा, दुहबी, गाईघाट, राजविराज, बराहक्षेत्र, चतरा र आसपासका स्थानीय बजारमा बिक्री हुने गरेको छ। च्याउ बिक्रीका लागि बजारको अभाव नरहेको उनको भनाइ छ। हाल च्याउ प्रतिकिलो १८० देखि १९० रुपैयाँसम्ममा बिक्री हुने गरेको छ भने फार्मबाट खरिद गर्ने व्यापारीले केही सस्तोमा लैजाने गरेका छन्।
‘गत वर्षको तुलनामा यस वर्ष च्याउको मूल्य घटेको छ’, गुप्ताले भने। गर्मी मौसमको तुलनामा जाडोयामका मङ्सिर, पुस र माघ महिनामा च्याउको मूल्य राम्रो हुने र प्रतिकिलो २२० रुपैयाँसम्म पुग्ने गरेको उनले जानकारी दिए।
‘विदेशमा धेरै मिहिनेत गर्दा पनि कमाइले खर्च धान्न कठिन हुन्थ्यो’, उनले भने। स्वदेशमै व्यवसाय गर्दा आफूले आम्दानी गर्नुका साथै अरूलाई पनि रोजगारी दिन सकेकाले सन्तुष्टि मिलेको उनी सुनाउँछन्। अहिले उनको फार्ममा छ जना कामदार कार्यरत छन् भने परिवारका सदस्यले पनि च्याउ खेतीमा सहयोग गर्दै आएका छन्।
च्याउ टिप्ने, व्यवस्थापन गर्ने र बजारसम्म पुर्याउने काममा परिवारका सदस्य पनि खटिने गरेको उनले बताए।
‘च्याउ खेतीका लागि धेरै जग्गा आवश्यक पर्दैन’, गुप्ताले भने, ‘थोरै क्षेत्रफलबाट पनि राम्रो आम्दानी गर्न सकिन्छ।’ चैतमा लगाइएको च्याउ वैशाखको अन्तिम सातादेखि टिप्न योग्य हुने र वर्षमा करिब १० महिनासम्म उत्पादन लिन सकिने उनले जानकारी दिए।
सुरुमा कृषिसम्बन्धी ज्ञान र प्रविधिको कमीले समस्या भोग्नुपरे पनि अनुभव र सीप बढ्दै जाँदा व्यवसाय सञ्चालन सहज हुनुका साथै उत्पादन र आम्दानी दुवै बढेको गुप्ताले बताए। च्याउ खेतीका लागि विशेषगरी पराल, चुन, बाँस, खर र प्लास्टिक आवश्यक पर्ने उनको भनाइ छ। खेतीमा कुनै पनि विषादी प्रयोग नगरी च्याउ उत्पादन गर्दै आएको र यस्तो च्याउको माग बढ्दै गएको उनले बताए।
गुप्ताले २०८० सालमा सुनसरी कृषि ज्ञान केन्द्रबाट एक लाख रुपैयाँ र बराहक्षेत्र नगरपालिकाबाट ९० हजार रुपैयाँ अनुदान प्राप्त गरेका थिए। त्यसैगरी, नगरपालिकाबाट ५० प्रतिशत अनुदानमा मिनीट्याक्टर, सफारी, टनेललगायत खेतीका लागि आवश्यक सामग्री प्राप्त भएपछि व्यवसाय सञ्चालनमा थप सहज भएको उनले बताए।
‘थोरै दुःख र मिहिनेत गर्ने हो भने नेपालमै राम्रो आम्दानी गर्न सकिन्छ’, गुप्ताले भने, ‘युवा वैदेशिक रोजगारीमा जानै पर्छ भन्ने छैन, गाउँमै थोरै लगानीमा व्यवसाय सञ्चालन गरेर पनि जीवन चलाउन सकिन्छ।’
-रासस
