सुनसरी/ सुनसरीको हरिनगर गाउँपालिकामा प्रहरीले ब्राउन सुगरसहित एक जनालाई पक्राउ गरेको छ।
हरिनगर गाउँपालिका–६ स्थित भित्री सडकखण्डमा भारतबाट नेपालतर्फ आउँदै गरेको प्रदेश १–०२–०५८ प ८३७२ नम्बरको मोटरसाइकललाई प्रहरीले शंका लागेर जाँच गरेको थियो।
प्रहरी चौकी घुस्कीहाटबाट खटिएको प्रहरी टोलीले मोटरसाइकल चालक हरिनगर गाउँपालिका–५ का ५५ वर्षीय नारायण मेहताको खानतलासी गर्दा मोटरसाइकलको डिकीभित्र कालो प्लास्टिकमा लुकाइराखेको अवस्थामा ६ ग्राम ३३० मिलिग्राम ब्राउन सुगर फेला पारेको हो।
प्रहरीका अनुसार मेहताको साथबाट नेपाली रुपैयाँ २५ हजार ४६५ र भारतीय रुपैयाँ ५५० समेत बरामद भएको छ।
लागुऔषध, नगद र मोटरसाइकलसहित नियन्त्रणमा लिइएका मेहतालाई जिल्ला प्रहरी कार्यालय सुनसरीमा ल्याएर घटनाबारे थप अनुसन्धान भइरहेको प्रहरीले जनाएको छ।
