_1693980289.gif "#")
धरान/ “कालोपत्रे सहर” भनेर चिनिने धरान आज आफ्नै पहिचानमाथि प्रश्न उठ्ने अवस्थामा पुगेको छ ।
नगर सरकार छ, जनप्रतिनिधि छन्, बजेट पनि छ — तर धरान–१२ चतरालाइनदेखि धरान–१८ स्थित बीपी कोइराला स्वास्थ्य विज्ञान प्रतिष्ठानसम्म जाने मुख्य सडक भने आज बेवारिसे बनेको छ ।
धरान–१२ चतरालाइनबाट धरान–१७ रेल्वे हुँदै धरान–११ मंगलबारे पुग्ने यो व्यस्त सडकखण्ड अहिले कालोपत्रे होइन, खाल्डाखुल्डीको जालो बनेको छ । धरान उपमहानगरपालिकाको गेट अगाडिको ठूलो खाल्डा केही समयअघि पुरिए पनि त्यसपछि आपगाछीसम्मको करिब दुई किलोमिटर सडक अझै पनि उस्तै दयनीय अवस्थामा छ ।
स्थानीय बासिन्दा आक्रोशित छन् । “हामी कर तिर्छौँ, तर सास्ती सडकले दिन्छ,” एक स्थानीयले गुनासो गरे । उनका अनुसार सडक मर्मत नहुँदा पैदलयात्रीदेखि सवारी चालकसम्म सबै जोखिममा परेका छन् ।
सवारी चालकहरू भन्छन्— खाल्डा बचाउन खोज्दा अर्को सवारीसँग ठोक्किने अवस्था आउँछ । यसले ठूला दुर्घटना निम्त्याउने खतरा बढाएको छ । गत असोजमा परेको अविरल वर्षाले क्षतिग्रस्त बनेका सडकका खाल्डाखुल्डी अहिलेसम्म टालिन नसक्नु नगर सरकारको उदासीनताको प्रमाण भएको उनीहरूको आरोप छ ।
यो सडक दैनिक सयौँ सवारी साधनले प्रयोग गर्छन् । विशेष गरी बीपी कोइराला स्वास्थ्य विज्ञान प्रतिष्ठान जाने एम्बुलेन्स, बिरामी बोकेका गाडी र आपतकालीन सेवाका लागि यही सडक जीवनरेखा हो । तर यही जीवनरेखा आज जोखिमको बाटोमा परिणत भएको छ ।
धरानवासीको प्रश्न सीधा छ—
“नगर सरकार भए पनि, जनताको ज्यानभन्दा ठूलो बेवास्ता किन ?” तर यस गम्भीर समस्यातर्फ सम्बन्धित निकायको ध्यान अझै पुग्न सकेको छैन ।
