सामाजिक सञ्जालमार्फत करोडौं ठगी गर्ने युवक पक्राउ ठगी प्रकरणमा फरार अभियुक्त सीमाबाट पक्राउ

धरान/ सामाजिक सञ्जालमार्फत ठगी गरेको अभियोगमा फरार रहँदै आएका एक युवकलाई सुनसरीको नेपाल–भारत सिमाबाट प्रहरीले पक्राउ गरेको छ।

जिल्ला सुनसरी देवानगन्ज गाउँपालिका–१ घर भइ ठगी अभियोगमा फरार रहेका २० वर्षीय कुशेश्वर मेहतालाई प्रहरीले विशेष सूचनाका आधारमा मिति २०८२ साल असार १० गते बेलुकी ५:१० बजे कोशी गाउँपालिका–८, भण्टाबारीस्थित नेपाल–भारत सिमाक्षेत्रबाट पक्राउ गरेको हो।

प्रहरीका अनुसार उनलेFacebook Messenger मार्फत “Vanida Suwan” नामक आइडी प्रयोग गरी “Phueng Vanida” नाम बताउँदै आफू थाइल्याण्डको SIAM Commercia मेनेजर भएको झूठो परिचय दिएका थिए।

त्यस क्रममा उनले ALEN ARBI शाही नाम गरेका व्यक्तिको बैंक खातामा ठूलो रकम रहेको, र निजको कुनैपनि उत्तराधिकारी नभएको भन्दै कुर्मराज शाहीलाई त्यही रकम प्राप्त गरिदिने प्रलोभन देखाएर झूठ्ठो विश्वास दिलाएका थिए।

ठगले आफ्नो जात ALEN ARBI को जातसँग मिल्दो भएको भन्दै खातामा रहेको सम्पूर्ण रकम हस्तान्तरण गरिदिने बहानामा विभिन्न मितिमा कुर्मराज शाहीलाई झुक्याई रु ६२ लाख ७५ हजार २ सय विभिन्न बैंक खातामा ट्रान्सफर गर्न लगाएका थिए।

यो कार्य मुलुकी अपराध संहिता, २०७४ को दफा २४९ विपरीतको ठगी सम्बन्धी कसुरअन्तर्गत पर्ने भएकोले पक्राउ परेका मेहतालाई थप अनुसन्धान तथा आवश्यक कानुनी कारबाहीका लागि नेपाल प्रहरी प्रधान कार्यालय, साइबर ब्यूरो, भोटाहिटी, काठमाडौँ पठाइएको जिल्ला प्रहरी कार्यालय सुनसरीले जनाएको छ।