विराटनगर महानगरको ४ अर्ब ४० लाखको बजेट सार्वजनिक

विराटनगर/  विराटनगर महानगरपालिकाले आर्थिक वर्ष २०८२/८३ का लागि ४ अर्ब ४० लाख रुपैयाँ बराबरको बजेट सार्वजनिक गरेको छ ।

सोमबार सम्पन्न १६औँ नगरसभामा उपप्रमुख शिल्पा निराला कार्कीले आगामी वर्षका लागि बजेट प्रस्तुत गरेकी हुन् ।

बजेट अनुसार प्रशासनिक खर्चका लागि ६४ करोड ७५ लाख रुपैयाँ विनियोजन गरिएको छ । ऋणको सावाँ र ब्याज भुक्तानीमा ५ करोड, चालु वर्षका बाँकी भुक्तानीमा ८ करोड र बहुवर्षीय आयोजनाको भुक्तानीका लागि ७० करोड छुट्याइएको छ ।

सडक पूर्वाधार र बस्ती विकास तथा नगरस्तरीय योजना लगायत पूर्वाधार विकासतर्फ मात्र १ अर्ब ६८ करोड ८३ लाख १३ हजार रुपैयाँ विनियोजन गरिएको छ ।

वडास्तरीय योजना तथा कार्यक्रम सञ्चालनका लागि ४३ करोड ५६ लाख, शैक्षिक विकासमा ७५ करोड ५१ लाख ३० हजार, स्वास्थ्य क्षेत्रमा १५ करोड ३५ लाख र महिला लक्षित कार्यक्रमका लागि ९१ लाख रुपैयाँ छुट्याइएको छ ।

सामाजिक विकासतर्फ कूल १ अर्ब ८९ लाख ३० हजार रुपैयाँ विनियोजन गरिएको छ । कृषि, पशुपालन, सहकारी, उद्यमशीलता, उपभोक्ता संरक्षण तथा पर्यटन प्रवर्द्धनका कार्यक्रमका लागि २ करोड ९६ लाख २५ हजार रुपैयाँ छुट्याइएको छ ।

वन, वातावरण र विपद् व्यवस्थापनतर्फ ३ करोड १० लाख तथा सुशासन र संस्थागत विकासका लागि ३ करोड ३० लाख विनियोजन गरिएको छ ।

बजेटका स्रोततर्फ संघीय सरकारबाट वित्तीय समानीकरण अनुदानमार्फत ३४ करोड ३४ लाख, प्रदेश सरकारबाट ३ करोड ६२ लाख ३० हजार र घरजग्गा रजिष्ट्रेसनबाट ९४ करोड ६० लाख ३ हजारसहित आन्तरिक राजस्वबाट १ अर्ब ४० करोड रुपैयाँ आम्दानी हुने अनुमान गरिएको छ ।

त्यस्तै, संघीय सशर्त अनुदान ८३ करोड ३४ लाख र प्रदेश सरकार सशर्त अनुदान ४ करोड २३ लाख ६७ हजार रुपैयाँ रहने अनुमान छ ।

गत आर्थिक वर्ष २०८१/८२ मा महानगरले ३ अर्ब ५० करोड ३० लाख रुपैयाँको बजेट प्रस्तुत गरेकोमा २ अर्ब २६ करोड ३५ लाख रुपैयाँ अर्थात् ६५ प्रतिशत आम्दानी भएको विवरण नगरसभामा प्रस्तुत गरिएको छ ।