_1693980289.gif "#")
धनकुटा/ धनकुटाको पाख्रीबास नगरपालिका–६ डिकुरेमा एकैपटक चार सवारीसाधन एकापसमा ठोक्किँदा कोसी राजमार्ग पूर्ण रूपमा अवरुद्ध भएको छ।
धनकुटा जिल्ला प्रहरी कार्यालयका अनुसार सोमबार बिहान करिब ११ बजे प्रदेश १–०२–००२ ख ६६१ नम्बरको ट्रक बिग्रिएर पछाडि सर्दै गर्दा सोही दिशाबाट आइरहेको प्रदेश १–०२–००१ क ४८९१ नम्बरको टिपरमा ठोक्किएको थियो।
टिपरको पछाडि रहेको प्रदेश १–०२–००१ ज ४१७८ नम्बरको ईभी गाडी पनि ठक्कर खाँदै अर्को ट्रक (प्रदेश १–०२–००१ क ४८९२ नम्बर)मा ठोक्किएपछि सडक पूर्ण रूपमा अवरुद्ध भएको प्रहरी प्रवक्ता डिएसपी ओमप्रकाश खनालले जानकारी दिए।
दुर्घटनामा मानवीय क्षति नभए पनि चारै सवारीसाधन सडकमा अड्किएका कारण धनकुटादेखि भोजपुर र सङ्खुवासभा जोड्ने कोसी राजमार्गको आवागमन अवरुद्ध भएको छ।
सडक बन्द हुँदा दर्जनौँ सवारीसाधन बाटोमै रोकिएका छन्। यात्रुहरू लामो समयदेखि अलपत्र परेका छन्।
डिएसपी खनालका अनुसार सडक खुलाउन जेसीबी प्रयोग गरी सवारीसाधन हटाउने प्रयास भइरहेको छ। बाटो सुचारु हुन करिब तीन घण्टा लाग्ने अनुमान गरिएको छ।
_Poush 22_1736170149.jpg "#")