_1693980289.gif "#")
इटहरी/ इटहरी उपमहानगरपालिकाले विषादी मिसिएको ३ हजार २ सय ९० केजी आँप नष्ट गरेको छ।
उपमहानगरको खाद्य अनुसन्धान टोलीले वडा नं. ६ मा रहेका फलफूल गोदामहरूमा गरेको अनुगमनका क्रममा ती आँपहरूमा स्वास्थ्यका लागि हानिकारक रसायन ‘एसिटिलिन ग्यास’ प्रयोग गरिएको पाइएपछि जफत गरी नष्ट गरिएको हो।
अनुगमनका क्रममा ‘न्यू राइजिङ फुड सप्लायर्स, इटहरी’ को गोदाममा ९६ कार्टुन र ‘न्यू सुनसरी फुड सेन्टर’ को गोदाममा १०६ क्यारेट आँप फेला परेका थिए। ती सबै आँपको कुल तौल ३२९० केजी रहेको इटहरी उपमहानगरपालिकाले जनाएको छ।
बजार अनुगमन शाखाका प्रमुख नोवेल भट्टराईका अनुसार ती आँपहरूमा फलफूल कृत्रिम रूपमा छिटो पकाउन प्रयोग हुने एसिटिलिन ग्यास भेटिएको हो।
खाद्य नियमावली २०२९ को नियम १९ (घ) अनुसार यस्तो ग्यासको प्रयोग गरी फलफूल पकाउन, भण्डारण गर्न वा बिक्री वितरण गर्न निषेध गरिएको छ।
गोदाम सञ्चालकहरूले ती आँपहरू नेपालको पश्चिमी भागबाट ल्याएको दाबी गरे पनि अनुगमन टोलीले ती आँपहरू भारतीय पत्रिकामा बेरिएको अवस्थामा फेला पारेको थियो।
उक्त अवैध कार्यका लागि इटहरी उपमहानगरपालिकाले बजार अनुगमन ऐन २०७९ र आर्थिक ऐन २०८१ अनुसार दुवै व्यवसायीक फर्मलाई जनही ५० हजार रुपैयाँ जरिवाना गरेको प्रमुख भट्टराईले जानकारी दिए।
इटहरी उपमहानगरपालिकाले उपभोक्ताको स्वास्थ्य सुरक्षालाई मध्यनजर गर्दै बजार अनुगमनलाई निरन्तरता दिँदै आएको जनाएको छ।
उपभोक्ता तथा सर्वसाधारणबाट प्राप्त गुनासोलाई प्राथमिकतामा राख्दै बजारमा निगरानी बढाइएको पनि उपमहानगरले स्पष्ट पारेको छ।
स्वास्थ्यकर्मीहरूले बजारमा अत्यधिक विषादी प्रयोग गरिएका फलफूल तथा तरकारी पाइने गरेको भन्दै उपभोक्तालाई सजग रहन र जाँचिएर मात्र उपभोग गर्न आग्रह गरेका छन्।
