-साङ्केतिक तस्बिर
सुनसरी / मोरङको कानेपोखरी गाउँपालिका–५ का ५२ वर्षीय जितलाल राजवंशीको शव पाँच दिनपछि जङ्गलमा फेला परेको छ। निगुरो टिप्न भनी घरबाट निस्किएका राजवंशी यही जेठ २ गते बिहानदेखि बेपत्ता थिए।
राजवंशीको खोजीमा परिवार र स्थानीयवासी निरन्तर खटिएका थिए। अन्ततः जेठ ६ गते बिहान करिब ११ बजे कानेपोखरी–७ स्थित राष्ट्रिय वन क्षेत्रभित्र उनको शव फेला परेको हो। शव घरदेखि करिब पाँच किलोमिटर उत्तरतर्फको जङ्गलभित्र भेटिएको स्थानीयले जानकारी दिएका छन्।
शव फेला परेपछि तत्काल इलाका प्रहरी कार्यालय कानेपोखरीलाई खबर गरियो। सूचना प्राप्त हुनेबित्तिकै प्रहरी निरीक्षकको नेतृत्वमा टोली घटनास्थलमा पुग्यो। साथै, इलाका प्रहरी कार्यालय पथरीबाट थप प्रहरी र फरेन्सिक टोलीसमेत घटनास्थल पठाइएको मोरङ प्रहरीले जनाएको छ।
हालसम्म मृत्युकाको कारण स्पष्ट नभएको र घटनाबारे विस्तृत अनुसन्धान भइरहेको प्रहरीले जनाएको छ। राजवंशीको शवको प्रकृति, अवस्था र वरपरका प्रमाणको परीक्षणपछि मात्रै मृत्युको कारण खुल्ने बताइएको छ।
