याङवरक/ कक्षा १२ को परीक्षा सुरु भएको केही मिनेटमै मोबाइलमार्फत प्रश्नपत्रको फोटो बाहिर पठाएको आरोपमा एक विद्यार्थी पक्राउ परेका छन्।
पक्राउ पर्नेमा याङवरक गाउँपालिका–४ स्थित थर्पु माध्यमिक विद्यालय परीक्षा केन्द्रमा परीक्षा दिइरहेका गणेश माविका छात्र निशेक काम्वाङ रहेका छन्।
जिल्ला प्रहरी कार्यालय पाँचथरका निमित्त सूचना अधिकारी प्रहरी निरीक्षक रुपेश तामाङका अनुसार आइतबार अङ्ग्रेजी विषयको परीक्षा सुरु भएलगत्तै काम्वाङले मोबाइल फोन प्रयोग गरी प्रश्नपत्रको फोटो खिचेर बाहिर पठाएका थिए।
परीक्षा केन्द्रमा खटिएका केन्द्राध्यक्ष, शिक्षक तथा कर्मचारीहरूले घटना तुरुन्तै प्रहरीलाई जानकारी दिएपछि काम्वाङलाई नियन्त्रणमा लिइएको हो।
प्रारम्भिक अनुसन्धानमा उनले प्रयोग गरेको मोबाइल फोन समेत बरामद गरिएको प्रहरीले जनाएको छ।
यस घटनाले परीक्षाको गोपनीयता र निष्पक्षतामाथि गम्भीर प्रश्न उठाएको छ।
यता जिल्ला शिक्षा अधिकारीहरूले घटनाबारे थप छानबिन सुरु गरिएको र दोषीलाई आवश्यक कानुनी कारबाही हुने जनाएका छन्।
