तेह्रथुम/ डच भाषाशास्त्री जर्ज भान ड्रिमद्वारा लिखित ‘अ ग्रामर अफ लिम्बू बेस्ड अन दी फेदापे डाइलेक्ट अफ दिओल्ड लिम्बू हर्ट ल्याण्ड’ पुस्तक विमोचन भएको छ।
म्याङलुङ नगरपालिकाको सहयोगमा बुधबार तेह्रथुमको सदरमुकाममा पुस्तक विमोचन गरिएको हो। लेखक ड्रिम १० भाषाका विज्ञका रूपमा परिचित छन्।
हल्याण्ड निवासी जर्ज भान्ड्रिमले २०३९ सालमा तेह्रथुमको म्याङलुङ(१० तत्कालीन तम्फुुला गाउँ पञ्चायतस्थित तम्फुला गाउँमा छ महिना बसेर फेदापे लिम्बू भाषाको अध्ययन गरेका थिए।
लेखक भान्ड्रिमल आफू हल्याण्डस्थित भाषा विज्ञानको विद्यार्थी रहँदा जर्मन भाषा र हल्यान्ड भाषाविद्को चिनिया भोट बर्मेली भाषाको पुरानो रूप लिम्बूवानमा भेटिन्छ भन्ने अनुसन्धानात्मक पुस्तक अध्ययनपछि प्रोफेसरहरूले आफूलाई नेपालको लिम्बूवान् क्षेत्रमा पठाएको स्मरण गरे।
उनले स्थानीय नारायण लिम्बूको सहायतामा लिम्बू भाषाको अध्ययन गरेको बताए। पुस्तकमा फेदापे लिम्बू भाषाको व्याकरण उल्लेख गरिएको छ।
तीन दशक पहिले प्रकाशित पुस्तकको संस्करण नेपालीहरूको पहुँचमा पुग्न सक्नेगरी स्विस राजदूतावासलगायतको सहयोगमा प्रकाशन गरेको प्रकाशक जगदम्बा प्रकाशनले जानकारी दिएको छ ।
