१० महिनामा १० लाख पर्यटक नेपाल भित्रिए "भारतीय र चिनियाँ घटे, अमेरिकी पर्यटक बढे"

काठमाडौँ । सन् २०२४ को १० महिनामा ९ लाख ४० हजार ७३२ विदेशी पर्यटक नेपाल भित्रिएका छन् । नेपाल पर्यटन बोर्डको तथ्यांकअनुसार अक्टोबरमा कूल १ लाख २४ हजार ३९३ विदेशी पर्यटक नेपाल आएका हुन् ।
यो सङ्ख्या अघिल्लो वर्षको सोही अवधिको तुलनामा ६.४ प्रतिशतले बढी हो । सन् २०२३ को अक्टोबरमा १ लाख १७ हजार ३०६ पर्यटक आएका थिए ।

कोभिड–१९ (कोरोना महामारी) पूर्व अर्थात सन् २०१९ को तुलनामा ९२.९६ प्रतिशतले पर्यटकको सङ्ख्यामा पुनरुत्थान भएको बोर्डले जनाएको छ ।सन् २०१९ को अक्टोबरमा १ लाख ३४ हजार ९६ विदेशी पर्यटक आएका थिए ।बोर्डका निर्देशक मणिराज लामिछानेका अनुसार समग्रमा विदेशी पर्यटक आगमन सन्तोषजनक छ । “समग्रमा पर्यटक आगमन सकारात्मक देखिन्छ ।

अक्टोबरमा आशातित पर्यटक आउन सकेनन्, किनकी महिनाको सुरुआतमै अविरल वर्षाले विपद्जन्य घटना भयो । अबको दुई महिनामा पर्यटक बढ्ने अनुमान गर्न सकिन्छ ।”बोर्डको विश्लेषणमा अगष्ट, सेप्टेम्बार र अक्टोबरमा भारतबाट आउने पर्यटक घटेका छन् । पछिल्ला २ महिनामा चीनबाट आउने पर्यटक पनि घटे ।

अक्टोबरमा भारतबाट १६ हजार ३१३ पर्यटक आएका छन् । गत सेप्टेम्बरमा भारतबाट २२ हजार ९८४ पर्यटक आएका थिए । यो करिब १३ प्रतिशत गिरावट हो । अगस्टमा २५ हजार ८३२ भारतीय पर्यटक आएका थिए । अक्टोबरमा चीनबाट आएका ७ हजार ७५० पर्यटकले नेपाल भ्रमण गरेका छन् ।

सेप्टेम्बरमा ८ हजार ४२ र अगस्टमा चीनबाट ६ हजार ६१४ चिनियाँ पर्यटक आएका थिए । मनसुनका कारण भारतीय र चिनियाँ पर्यटक घटेको अनुमान गरिएको छ ।
अक्टोबरमा अमेरिकाबाट आउने पर्यटकको सङ्ख्या अघिल्लो महिनाको तुलनामा १२.८८ प्रतिशतले बढेर कूल १६ हजार २३ पुगेको छ । सेप्टेम्बरमा १० हजार ८४ अमेरिकी पर्यटक भित्रिएका थिए । बेलायतबाट ८ हजार १९ पर्यटक नेपाल भित्रिएका छन् । अष्ट्रेलियाबाट ६ हजार ९२९, जर्मनीबाट ६ हजार १८ र फ्रान्सबाट ५ हजार ४८५ पर्यटक आएका छन ।

बङ्गलादेशबाट ४ हजार ४७६, श्रीलङ्काबाट ३ हजार ११२ र इटालीबाट २ हजार ६३५ पर्यटक आएका छन् ।मार्चमा सबैभन्दा बढी १ लाख २८ हजार १६७ पर्यटक आएका छन् भने सबैभन्दा कम जुलाईमा ६४ हजार ५९९ पर्यटकले नेपाल भ्रमण गरेका छन् ।

अक्टोबरमा १ लाख २४ हजार ३९३ अप्रिलमा १ लाख ११ हजार ३ हजार ७६ पर्यटक आए । सेप्टेम्बरमा ९६ हजार ३०५, जनवरीमा ७९ हजार १ सय , फेब्रअरीमा ९७ हजार ४२६, मेमा ९० हजार २११, जुनमा ७६ हजार ७३६ र अगस्टमा ७२ हजार ७१९ पर्यटक नेपाल आएका छन् ।