ताप्लेजुङमा घरेलु हिंसाका घटना वृद्धि

ताप्लेजुङ/  हिमाली जिल्ला ताप्लेजुङमा घरेलु हिंसाका घटनामा वृद्धि भएको छ । अनौपचारिक क्षेत्र सेवा केन्द्र ९इन्सेक० को तथ्यांकअनुसार जिल्लामा घरेलु हिंसासम्बन्धी घटना वृद्धि हुँदै गएको पाइएको हो ।

इन्सेक प्रतिनिधि एलिना दियालीका अनुसार पछिल्लो छ महिनाको अवधिमा घरेलु हिंसासम्बन्धी घटना मात्र १६ वटा भएका छन् ।

नेपाल मानवअधिकार वर्ष पुस्तक–२०२५ तयारी स्वरूप शनिवार आयोजित अर्ध–वार्षिक समीक्षा कार्यक्रममा इन्सेक प्रतिनिधि दियालीका अनुसार मानवअधिकार उल्लंघन सम्बन्धी ३० वटा घटना भएकोमा सबैभन्दा बढी १६ वटा घरेलु हिंसासम्बन्धी रहेको छ ।

सन् २०२४ को जनवरीदेखि जुनसम्म अर्थात् छ महिनाको अवधिमा भएको घरेलु हिंसासम्बन्धी घटनाबाट एक जना पुरुष १६ महिला गरी १७ जना पीडित भएका छन् ।

घरेलु हिंसासम्बन्धी घटनामा श्रीमान्–श्रीमतीबिच अर्थात् पारिवारिक झैँ(झगडा बढी रहेको इन्सेक प्रतिनिधि दियालीले जानकारी दिइन् । सन् २०२३ मा वर्षभरमा घरेलु हिंसासम्बन्धीका १८ वटा मात्र घटना भएका थिए ।

यस्तै छ महिनामा कुटपिटसम्बन्धी छ वटा, करणीसम्बन्धी छ वटा, जातीय विभेदसम्बन्धी एक र आत्महत्या दुरुत्साहनसम्बन्धी एउटा घटना भएको छ ।इन्सेक प्रतिनिधि दियालीले ताप्लेजुङ कारागारमा क्षमताभन्दा पाँच गुणा बढी कैदी तथा थुनुवा रहेकाले पूर्ण मानवअधिकार कायम हुनमा समस्या रहेको बताइन् ।

कैदी बन्दीको सङ्ख्याअनुसार आवास, शौचालय, खानेपानी लगायतका संरचना व्यवस्थापनले उनीहरूको बसाइमा भने भद्रगोल अवस्था नरहेको कारागारका प्रशासक कुलेन्द्र खवासले जानकारी दिए ।
अर्ध–वार्षिक समीक्षा कार्यक्रममा प्रमुख जिल्ला अधिकारी रवीन्द्रप्रसाद आचार्यले यथार्थ तथ्यांकसहित अन्य थुप्रै प्रकृतिका मानवअधिकार उल्लङ्घनका घटना हुनसक्ने भन्दै प्रतिवेदनमा सबै घटनाहरू समेट्न सुझाव दिए ।