मोरङ /कोशी प्रदेशमा पछिल्लो समय टिपर आतंक समस्याको रुपमा रहेको छ ।
टिपरकै कारण तीन बर्ष आठ महिनामै कोशी प्रदेशका विभिन्न ठाउँमा ५८ जनाले ज्यान गुमाइसकेका छन् ।
मोरङको बेलबारी नगरपालिका–१ को पूर्व–पश्चिम राजमार्गमा टिपरको ठक्करबाट शुक्रबार विहान तीन जनाको मृत्यु भएको छ । यस्तै सोही घट्नामा परीे दुई जना घाइते भए थिए ।
टिपरको ठक्करबाट बोलेरो चालक विर्तामोड नगरपालिका–२ झापाका ३६ बर्षीय कृष्ण गजुरेल, बोलेरोमा सवार कमल गाउँपालिका–२ का ५२ बर्षीय यदुकान्त भट्टराई र कमल गाउँपालिका–४ की ४४ बर्षीया दिपा खनालको उपचारको क्रममा मृत्यु भएको हो ।
मोरङ ट्राफिक प्रहरी प्रमुख प्रहरी निरीक्षक सुमन न्यौपानेका अनुसार विर्तामोड–२ की ४८ वर्षीया गायत्री भट्टराई र विर्तमोड–४ का ४६ वर्षीय हरि खनालको घाइते अवस्थामा न्युरो अस्पताल बिराटनगरमा उपचार भइरहेको छ ।
गत माघ १४ गते विराटचौकबाट– विराटनगरतर्फ आउँदै गरेको ना ३ ख ३३५५ नम्बरको टिपरको ठक्करबाट सुन्दरहरैंचाकी ११ वर्षीया बालिका लक्ष्मी ढकालको मृत्यु भएको थियो ।
ढकालको मृत्युपछि आक्रोशित स्थानीयले सोही सडकमा कुद्ने ७ वटा टिपरमा आगजनी गरेका थिए ।
गएको मंसिरमा पनि सोही सडक खण्डमा टिपरको ठक्करबाट उदयपुर रौतामाई नगरपालिका–२ की ३५ वर्षीया गीता कटुवालको मृत्यु भएको थियो ।
मोरङमा टिपरबाट भएका तीन गम्भीर दुर्घटना चालकको असावधानीका कारण भएको प्रहरीको भनाइ छ ।
मोरङ जिल्लामा मात्र होइन, कोशी प्रदेशका अन्य जिल्लामा पनि टिपरको आतंक उस्तै छ ।
तीन वर्ष ८ महिनामा कोशी प्रदेशमा ५८ जनाको टिपरबाट ज्यान गएको ट्राफिक प्रहरीले जनाएको छ ।
यसबीच भएका २७९ वटा टिपर दुर्घटनामा पर्दा ५८ जनाको मृत्यु र ३५२ जना घाइते भएको प्रदेश ट्राफिक प्रहरीले जनाएको छ ।
आर्थिक वर्ष २०७७/६८ मा ७८ वटा दुर्घटना भएकोमध्ये १९ जनाको मृत्यु भएको थियो भने ६९ जना घाइते भएका थिए ।
आर्थिक वर्ष २०७८/७९ मा भने दुर्घटना संख्यामा वृद्धि भएको पनि मृत्यु हुनेको संख्यामा भने कमी आएको ट्राफिक प्रहरीको अभिलेखमा रहेको छ ।
सो आर्थिक वर्षमा १०४ वटा टिपर दुर्घटना हुँदा १३ जनाको मृत्यु र १५० जना घाइते भएका थिए ।
यसैगरी आर्थिक वर्ष २०७९/८० मा ६९ टिपर दुर्घटनामा १८ जनाको मृत्यु र ८६ जना घाइते भएका थिए ।
चालु आर्थिक वर्ष २०८०/८१ को फागुन १८ गतेसम्म २८ टिपर दुर्घटनामा परी ८ जनाको मृत्यु भएको छ भने ४७ जना घाइते भएको नेपाल प्रहरी राष्ट्रिय सुरक्षा तथा ट्राफिक व्यवस्थापन कार्यालयले जनाएको छ ।
कोशी प्रदेशको १४ जिल्लामध्ये सबैभन्दा बढी दुर्घटना टिपर मोरङमा हुने गरेको पाइएको छ ।
चालु आर्थिक वर्षको फागुन १८ गतेसम्म कोशी प्रदेशमा २८ वटा टिपर दुर्घटना भएकोमा मोरङमा मात्र १० वटा टिपर दुर्घटना भएको छ । मोरङपछि उदयपुरमा बढी दुर्घटना भएको छ ।
उदयपुरमा ७, सुनसरी, झापा, पाँचथरमा २–२ वटा दुर्घटना भएको छ ।
तेह्रथुम र संखुवासभा १–१ वटा दुर्घटना भएको ट्राफिक प्रहरीको अभिलेखमा देखिन्छ ।
साँघुरा र जीर्ण सडक भएपनि टिपरको गति तीब्र भएकै कारण बढी दुर्घटना पाइएको ट्राफिक प्रहरीले जनाएको छ ।
साँघुरो सडक, तीब्र गति र ओभरट्याक गर्दा दुर्घटना हुने गरेको मोरङ ट्राफिक प्रहरी प्रमुख प्रहरी निरीक्षक सुमन न्यौपानेले जानकारी दिए ।
उनले भने ‘सुन्दरहरैचामा शुक्रबार विहान भएको दुर्घटना पनि ओभरटेककै कारण टिपर अनियन्त्रित भएपछि दुर्घटना भएको देखिएको छ, घटनाको थप अनुसन्धान भइरहेको छ ।
थप अनुसन्धानपछि बिस्तृतमा दुर्घटनाको कारण खुल्नेछ ।’
कतिपय दुर्घटनामा चालकको पनि लापरवाही देखिने ट्राफिक प्रहरीले जनाएको छ ।
ट्राफिक प्रहरीले बिहान साढे ९ देखि ११ बजेसम्म र साँझ साढे ३ देखि ५ बजेसम्म मुख्य बजार एरियामा टिपर कुदाउन रोक लगाएको छ l