धरान/ प्रत्येक वर्ष माघ शुक्ल पञ्चमीका दिन मनाइने विद्याकी देवी सरस्वतीको पूजा धरानमा समेत बिहिबार धुमधामका साथ मनाइयो ।
ऋतुहरुको राजा वसन्तको सुरुवात हुने दिन भएकाले यस दिनलाई वसन्त पञ्चमी पनि भनिन्छ । आजको दिनलाई अभिभावक तथा विद्यालयहरुले आफ्ना नानीहरुलाई अक्षर सुभारम्भ समेत गराउने गरेका छन् ।
धरानका संस्थागत तथा नीजि विद्यालयहरुले विद्याकी देवी सरस्वतीको धुमधाम मनाएका छन् ।
कतिपय विद्यालयहरुले भने यसलाई अवसरको रुपमा समेत लिएका छन् ।
अक्षर शुभारम्भको अवसर पारेर बालबालिकालाई भर्ना गर्ने सुनौलो अवसरका रुपमा समेत लिएका थिए ।
अक्षर सुभारम्भको दिन संस्थागत विद्यालय भन्दा पनि नीजि विद्यालयहरुले यसरी नयाँ भर्ना गरेका हुन् ।
एउटा उदाहरणमात्र हेर्ने हो भने आजकै दिन धरानको आदर्श माविले ६५ जना बालबालिकाकालाई भर्ना गरेको प्रिन्सििल लोकेन्द्र श्रेष्ठले बताए ।
सरस्वती पूजाको दिन भर्ना गर्दा भर्ना शुल्क लिने नगरेको उनीहरुको दाबी छ । आजको दिन भर्ना गर्दा विद्यार्थीहरुको अध्ययन क्षमता तिब्र भएर जाने विश्वास रहीआएको छ ।
त्यसो त बालबालिकाका अभिभावक नै यस कुरामा विश्वास राख्छन् । धरान १३ की सुमित्रा राईले आजकै दिन अक्षर शुभारम्भ गर्दा अध्ययन क्षमता बढ्ने भएकोले आजकै दिन भर्ना गरेर अक्षर सुभारम्म गरेको बताइन् ।
धरानका पुरानो संस्थागत विद्यालय पब्लिक माविमा भर्ना गर्न आउनु भएकी राईलाई पनि सरस्वती पूजाको दिन नानीलाई अक्षर शुभारम्भ गर्दा पढाईमा अब्बल हुने विश्वासले भर्ना गरेको बताइन् । सरस्वती पूजाकै दिन नानीहरुलाई अक्षर चिनाउँदा राम्रो हुने पब्लिक माविका प्राचार्य इन्द्रमोहन झा बताउछन् ।
सरस्वती पूजाले विद्यार्थीको मनोभावनलाई उच्च बनाउने र बढ्ने बानीको विकास गर्ने भएकोले यस दिन अक्षर चिनाउने दिनको रुपमा लिने गरेको उनी बताउछन् । सरस्वती पूजाको प्रत्येक बर्ष अभिभावक, शिक्षक तथा विद्यार्थीहरुको विश्वास बढ्दै गएको पाइएको छ ।
अधिकांश विद्यालयले सरस्वती पूजा नियमित पूजाको रुपमा लिने गरेका छन् कतिपय विद्यालयहरुले अवसरको रुपमा समेत सरस्वती पूजालाई लिने गरेको पाइएको छ ।