_1693980289.gif "#")
धरान/ महिलाहरुलाई पछिल्लो समय स्तन क्यान्सरको समस्या अत्याधिक देखिन थालेकोप्रति चिन्ता व्यक्त गर्दै चिकित्सकहरुले हेलचेक्र्याई नगर्न सुझाव दिएका छन् ।
लियो क्लब अफ घोपाको आयोजनामा धरान १७ को स्वास्थ्य केन्द्रमा स्तन क्यान्सरसम्बन्धी सचेतना कार्यक्रममा चिकित्सकले यस्तो सुझाव दिएका हुन् ।
स्तन क्यान्सर विशेष गरेर महिलामा हुने रोग हो । यो रोग लागेपनि धेरै महिलाहरुलाई रोगको विषयमा थाहा नहुँदा धेरै महिलाहरुले ज्यान गुमाउनु परेको छ ।
तर शुरुमै यसको उपचारसँगै आत्मबल बढाउन सके यो रोग सामान्य भएको चिकित्सकरुले बताएका छन् ।
सो अवसरमा बोल्दै स्तन रोग विशेषज्ञ डा. शारदा खड्काले समयमै जाँच गराउन नसक्दा महिलामा स्तन क्यान्सरको खतरा बढ्दै्र गएको बताइन् ।
उनले लक्षण देखिसक्दा पनि महिलाहरु मलाई केही भएको छैन भन्दै उपचारमा नआउने गरेका कारण समस्या बल्झिदै गएको बताइन् ।
उनले स्तन क्यान्सर हुदा के के लक्षणहरु देखिन्छन् भन्ने कुराको विषयमा सहभागीहरुलाई जानकारी गराइएकी थिइन् ।
उनका अनुसार बीपीमा २ बर्षमा २ सय जना स्तन क्यान्सर भएका विरामीहरुको उपचार भएको छ भने यो संख्या पछिल्लो समय बढ्दै्र गएको छ ।
विश्वमा २५ प्रतिशत महिलामा स्तन क्यान्सर भएपनि नेपालमा भने १७ प्रतिशत क्यान्सरका रोगीहरु रहेको तथ्यांक रहेको डा. खड्काको भनाई छ ।
यस विषयमा डा. खड्काले स्वास्थ्य केन्द्रमा भएका स्वयम् सेविकाहरुलाई पनि यो रोग थाहा पाउने र समाधान गर्ने उपायका विषयमा जानकारी गराउनु भएको थियो ।
वडामै आएका विरामीहरुहरुको अवस्था बुझ्न यसले सहज बनाएको स्वयम्सेविका रञ्जु भण्डारीले जानकारी दिइन् ।
विशेष गरेर खानपान, शारीरिक व्यायामलाई जोड दिन सके स्तन क्यान्सबाट बच्न सकिने जानकारी सहभागी महिलाहरुलाई गराइएको थियो । कार्यक्रममा ५० जना भन्दा बढी महिलाको सहभागिता रहेको थियो ।
नेपालमा बर्षेनी २६ हजार क्याम्सरका विरामी थपिने गरेको तथ्यांक छ ।
डा. खड्काका अनुसार प्रतिष्ठानमा उपचारमा आएका १ सयजनामध्ये सरदर ६ जनामा क्यान्सर देखिएको छ ।
क्यान्सरको पहिलो वा दोस्रो चरणमै उपचार गर्न सके यो रोग निर्मुल हुने भएकोले हेलचेक्र्याई नगर्न चिकित्सकहरुले सुझाएका छन् ।
स्तन क्यान्सर सहरी क्षेत्रमा भन्दा पनि ग्रामीण क्षेत्रमा बढी पाइएको छ । सचेतनाका कमी आर्थिक अवस्था कमजोर भएकै कारण उनीहरुमा उपचारको पहुँच नपुगेको हो ।
