_1693980289.gif "#")
- फाइल तस्बिर
धरान/ धरानको बीपी कोइराला स्वास्थ्य विज्ञान प्रतिष्ठानमा देखिएको विवादका विषयमा स्वास्थ्य मन्त्रालयमा बुधबार भएको छलफल निष्कर्षविहीन भएको छ ।
प्रधानमन्त्री पुष्पकमल दाहालले बीपी कोइराला स्वास्थ्य विज्ञान प्रतिष्ठानमा देखिएको समस्या तत्काल समाधान गर्न निर्देशन दिएको भोलिपल्टै स्वास्थ्य मन्त्रालयले छलफल थालेको थियो ।
स्वास्थ्यमन्त्री मोहनबहादुर बस्नेतले स्वास्थ्य सचिवसहित मन्त्रालयका उच्चअधिकारी र प्रतिष्ठानका निमित्त उपकुलपति डा. प्रह्लाद कार्की, शिक्षाध्यक्ष सञ्जीव शर्मा लगायत चारै जना पदाधिकारीलाई छलफलमा बोलाएका थिए । तर छलफलले कुनै निष्कर्ष भने निकाल्न सकेन ।
पदाधिकारीहरुले स्वास्थ्य मन्त्री बस्नेतलाई प्रतिष्ठानको समस्याबारे सुनाएका थिए ।
त्यसपछि मन्त्री बस्नेतले पनि समस्या समाधानका सुझाब दिएपनि समस्या समाधानका लागि ठोस निष्कर्ष ननिस्केको मन्त्री बस्नेतका प्रेस सल्लाहकार रामचन्द्र दुलालले जानकारी दिए ।
बैठकबाट कुनै निष्कर्ष ननिस्किएपछि मन्त्री बस्नेतले अन्तिममा मुख्य सचिव बैकुण्ठ अर्याललाई भेटेर आफ्नो कुरा राख्न सुझाव दिएका थिए ।
प्रतिष्ठानमा कर्मचारीको बढुवाको विषयलाई लिएर लामो समयदेखि विवाद चलिरहेको छ । प्रतिष्ठानका कर्मचारी, विद्यार्थी देखि विभागिय प्रोफेसर तथा शिक्षकहरु आन्दोलनमा छ । जसका कारण प्रतिष्ठानबाट प्रदान गरिने स्वास्थ्य सेवा समेत प्रभावित भइरहेको छ ।
प्रतिष्ठानबाट स्वास्थ्य सेवा समेत प्रभावित भएपछि धरान उपमहानगरपालिकाका मेयर हर्कंराज राई (हर्क साम्पाङ) ले स्वास्थ्य मन्त्री बस्नेतलाई पत्र समेत लेखेका थिए ।
कामु उपकुलपति प्रा.डा. प्रल्हाद कार्कीलाई उपस्थित गराइदिन भन्दै मेयर हर्क साम्पाङले स्वास्थ्य बस्नेतलाई पत्र लेखेका थिए ।
प्रतिष्ठानका चिकित्सक कर्मचारी वृत्तिविकासको मागसहित आन्दोलनमा उत्रिएपछि ४ दिनदेखि बहिरंग सेवा ठप्प छ । आन्दोलनका कारण बीपी स्वास्थ्य विज्ञान प्रतिष्ठानमा दिनहुँ सयौं बिरामी मारमा परेका छन् ।
