_1693980289.gif "#")
इलाम/ कात्तिक महिना लागेसँगै इलामका पर्यटकीय स्थलमा आन्तरिक पर्यटकको चहलपहल बढेको छ ।
पर्यटकीय गन्तव्य अन्तु, कन्याम, सन्दकपुरलगायतका स्थानमा रहेका होटल, कटेज र होमस्टेमा दैनिक पर्यटकको चाप बढ्न थालेको हो ।
सूर्योदयको दृश्यावलोकनका लागि प्रख्यात अन्तु डाँडामा अहिले आगामी सात दिनसम्मका लागि होटल, कटेज र होमस्टेहरु बुकिङ भइसकेका छन् । दैनिक करिब दुई हजार जना आन्तरिक तथा बाह्य पर्यटक अन्तु आउन थालेको पर्यटन व्यवसायी संघ अन्तुका अध्यक्ष रुद्र घिमिरेले बताए ।
‘नेपालका विभिन्न स्थानका पर्यटकसँगै भारतको गुहाटी, आसाम, सिलिगुढी लगायतका स्थानबाट आगामी सात दिनसम्मका लागि होटल, कटेजहरु बुकिङ भइसकेका छन्’ घिमिरेले भने, ‘कोभिड अगाडिकै लयमा पर्यटकको आवागमन सुरु भएको छ ।’
धेरैजसो विद्यालय र अन्य क्षेत्रको पनि दसैं–तिहार विदा भएकाले यो बीचमा अन्तु आउने पर्यटकको संख्या उल्लेख्य छ । सूर्योदयको दृश्यावलोकनका लागि बनाइएको भ्युटावर, त्यहाँको पटाङ्गीनी र त्यहाँको सौन्दर्यकरणले पनि पर्यटकलाई अन्तुले तानेको छ ।
सूर्योदयको दृश्यावलोकनसँगै अन्तु पोखरीमा डुङ्गा सयर, चिसो मौसमले पनि यो वर्ष पर्यटकलाई बढी तानेको पर्यटन व्यवसायीको भनाइ छ ।
सूर्योदय नगरपालिकाको फिक्कलस्थित छिविटारबाट १४ किलोमिटर पक्की सडक पार गरेर पुग्न सकिने अन्तुमा करिब एक सयभन्दा बढी होमस्टे, होटल र कटेज सञ्चालनमा रहेका छन् ।
अन्तुमा दैनिक करिब १५ लाख रुपियाँको कारोबार हुने गरेको व्यवसायीको भनाइ छ ।
