_1693980289.gif "#")
धरान–१७ को एक घरमा ग्यास सिलिन्डर विस्फोट हुँदा सोमबार आठजना घाइते भएका छन् । तीमध्ये दुईजनालाई अस्पतालले डिस्चार्ज गरिसकेको छ । केही समयअघि काठमाडौँमा ग्यास चुहावट भएकै कारण आगोले जलेर नेपाली काङ्ग्रेसका नेता चन्द्र भण्डारीकी आमाको निधन भएको छ भने नेता भण्डारी पनि घाइते भए । उनको उपचार भारतमा भइरहेको छ । यसबाहेक पनि यसबीचमा देशका विभिन्न स्थानमा यस्ता घटना भएका समाचार आएका छन् । पछिल्ला यी घटनाहरूले ग्यास विस्फोट वा ग्यासको चुहावटका कारण मानव जीवनमाथि असुरक्षा बढ्न थालेका सङ्केत दिएका छन् । हुन त ग्यास सिलिन्डर विस्फोट वा ग्यास चुहावटका घटना मात्र हुन थालेका होइनन् । यसअघि पनि यस्ता घटना पटक–पटक हुने गरेका थिए ।
पछिल्लो समयमा ग्यास सिलिन्डर चुहावट वा विस्फोटका घटनाबारे निरन्तर समाचार आउन थालेका छन् । यसर्थ, उपभोक्ताहरूले सचेतता अपनाउनु आवश्यक छ । यसका साथै ग्यास वितरक कम्पनीहरूले पनि सिलिन्डरको गुणस्तरीयतामा विशेष ध्यान दिनुपर्छ । सिलिन्डर निर्माण वा ग्यास भरेर वितरण प्रक्रियासम्म हुने कुनै पनि त्रुटि वा बेवास्तालाई सानो भन्न सकिँदैन । यस क्रममा हुने त्रुटि वा बेवास्ताले मानव जीवन नै अन्त्य हुनसक्ने सम्भावना हुने भएकोले यस क्रममा हरेक क्षण संवेदनशील हुनुपर्छ । सिलिन्डरको परीक्षणदेखि हरेक चरणमा प्रक्रियाको पालनामा कम्पनी गम्भीर हुनु आवश्यक छ ।
उपभोक्ताहरूमा पनि यस विषयमा जनचेतना फैलाउनु आवश्यक देखिएको छ । कस्तो अवस्थामा के गर्ने ? ग्यास सिलिन्डर वा विद्युतीय सामग्रीको प्रयोग गर्दा सावधानी अपनाउनुपर्ने पक्ष के के हुन् ? यस्ता विषयमा हरेक नागरिक सचेत हुनु आवश्यक छ । प्रयोग गर्ने तरिका वा अपनाउनुपर्ने सावधानीबारे जानकारी नहुँदा पनि दुर्घटना हुने सम्भावना हुनसक्छ । यसकारण दुर्घटनाबाट जोगिन सबैले सजग र सचेत हुनुपर्छ । सरकारले पनि ग्यास वितरक कम्पनीहरूमा नियमित अनुगमन गर्नु आवश्यक छ । सरकारले जनचेतनामूलक कार्यक्रमहरू पनि गर्नु वाञ्छनीय छ । यसतर्पm सबैको ध्यान जानुपर्छ ।
यी घटनाहरूबाट पाठ सिक्नु आवश्यक छ । अब ग्यास चुल्हा र सिलिन्डर प्रयोग गर्दा उपभोक्ताहरूले सचेत र सतर्क हुनुपर्छ । हाम्रै लापरवाहीका कारण हाम्रो जीवन जोखिममा पर्ने गरेको छ । त्यसकारण विद्युतीय सामग्री र प्रज्ज्वलनशील पदार्थहरू प्रयोग गर्दा हामीले लापरवाही वा बेवास्ता गर्नु हुँदैन । सिलिन्डरमा उल्लेख भएको म्याद गुज्रिने समय राम्ररी हेरेर मात्र सिलिन्डरको प्रयोग गर्नु श्रेयष्कर हुन्छ । सिलिन्डरमा रङ भर्खरै लगाइएको आधारमा सिलिन्डर छान्ने होइन, बरु कुच्चिएको छ कि छैन वा म्याद गुज्रिएको छ कि छैन भन्ने हेरेर सिलिन्डर छान्नुपर्ने विज्ञहरूले सुझाएका छन् । विद्युतीय सामग्रीहरूको प्रयोग गर्दा पनि तारको गुणस्तर र अवस्था राम्ररी हेरेर मात्र प्रयोग गर्नुपर्ने विज्ञहरूको सुझाव छ । विज्ञहरूका सुझावलाई बेवास्ता गर्नु आफ्नै लागि प्रत्युत्पादक हुनसक्छ ।
