धरान ः नेकपा एमाले १३ नं. वडा कमिटिले ज्येष्ठनागरिक सम्मान कार्यक्रममा ७० जना ज्येष्ठ नागरिकलाई सम्मान गरेको छ ।
आइतबार परेको राष्ट्रिय ढाका टोपी दिवसका अवसरमा सो सम्मान गरिएको हो । जसमा ७ जना ज्येष्ठ नागरिक महिला र ६३ जना ज्येष्ठ नागरिक पुरुषलाई ढाका टोपी र खादा लगाएर सम्मान गरिएको थियो । कार्यक्रमका प्रमुख अतिथि नेकपा एमाले केन्द्रीय कमिटि सदस्य तथा धरान उपमहानगरपालिकाका निवर्तमान उपप्रमुख मञ्जु भण्डारी सुवेदी रहेकी थिइन् ।
उनले यस्तो उदाहरणीय कार्यमा सबै जना लाग्नुपर्नेमा जोड दिइन् । सम्मान मन्तव्य राख्नेहरुमा १३ नं. धरानका वडाध्यक्ष नेत्रप्रसाद काफ्लेले लोप हुँदै गएको ढाका टोपी संरक्षण गर्नलाई दिवसमा मात्र हैन सधै प्रयोग गरेर अघि बढ्नु पर्नेमा जोड दिए । उनले भने – यो प्रदेशकै नमुना कार्यक्रम हो । यस्तो कार्यक्रम यस अघि कतै कसैले नगरेको पनि उनले दावी गरे ।
सोही कार्यक्रम नेकपा एमाले धरान नगर कमिटि अध्यक्ष हर्कजङ एवेङले पनि ज्येष्ठ नागरिकप्रतिको यस्तो कार्य सधैँ गरिराख्नुपर्नेमा जोड दिए । कार्यक्रममा नेकपा एमाले प्रदेश कमिटि सचिवालय सदस्य मुरारी सुवेदी, प्रदेश १ का सभामुख प्रदीप कुमार भण्डारी लगायत बुद्धिजीवी, पत्रकारहरुको उपस्थिति रहेको थियो । सो कार्यक्रममा नेकपा एमाले १३ नं. वडा इन्चार्ज हरिबहादुर कार्कीले स्वागत मन्तव्य राखेका थिए । कार्यक्रमको सञ्चालन नेकपा एमाले धरान १३ नं. वडा कमिटि सचिव विष्णु चौलागाईँले गरेका थिए ।