कोभिड सङ्क्रमणप्रति बेलैमा सजग बनौँ

छिमेकी देशहरूमा कोरोना भाइरसको नयाँ भेरिएन्ट देखिएकोले कोरोना सङ्क्रमणको जोखिम कायमै रहेको भन्दै स्वास्थ्य तथा जनसङ्ख्या मन्त्रालयले जनस्वास्थ्यका मापदण्ड पालना गर्न आग्रह गरेको छ । इसाई धर्मावलम्बीहरूको महत्वपूर्ण चाड क्रिसमस र अङ्ग्रेजी नयाँ वर्षमा भीडभाड हुनसक्ने भन्दै त्यस अवधिमा सतर्कता अपनाउन मन्त्रालयले आग्रह गरेको समाचार प्रकाशमा आएको छ । 

हुन पनि चीनमा कोभिडको सङ्क्रमण पुनः विस्फोटक रूपमा बढेको र त्यसलाई व्यवस्थापन गर्न चीनलाई ठूलो सकस परिरहेको समाचार विभिन्न अन्तर्राष्ट्रिय सञ्चार माध्यमहरूले प्रसारण गर्न थालेका छन् । चीनमा कोभिडको सङ्क्रमण दरसँगै मृत्युदर पनि अत्यधिक बढिरहेको समाचार भारतीय टेलिभिजन च्यानलहरूले पनि तीन दिनयता प्राथमिकताका साथ प्रसारण गरिरहेका छन् । भारतीय स्वास्थ्य मन्त्रालयले यसै विषयमा आपत्कालीन बैठक पनि बोलाएको छ । त्यहाँ अहिले जनस्वास्थ्यका मापदण्ड पालनासँगै बन्दाबन्दीसम्मका विषयमा बहस र चर्चा हुन थालेका छन् । हुन त भारतमा यसले राजनीतिक रङ पनि लिएको छ ।

छिमेकी राष्ट्र चीन मात्र होइन, जापान, दक्षिण कोरियालगायतका राष्ट्रहरूमा पनि कोभिडको सङ्क्रमण पुनः देखिन सुरु भएका समाचारहरू आएका छन् । त्यहाँ देखिएको कोभिडको सबभेरिएन्ट बीएफ ७ को सङ्क्रमण दर दिनदिनै बढ्दै गएको बताइएको छ । यस भेरिएन्टले छोटो समयमै धेरै व्यक्तिमा सङ्क्रमण हुने विज्ञहरूले बताएका छन् । भारतमा कम्तीमा चारजनामा यसको सङ्क्रमण पुष्टि भए पनि नेपालमा भने हालसम्म यो भेरिएन्ट पुष्टि नभएको मन्त्रालयले जनाएको छ । त्यै पनि छिमेकी देशहरूमा सङ्क्रमण देखिएकाले यहाँ सचेत हुन मन्त्रालयको आग्रह छ ।

यो आग्रहलाई सबैले गम्भीरतापूर्वक लिनु आवश्यक छ । कोभिडको सङ्क्रमण दर घटेसँगै हामीमध्ये अधिकांशले जनस्वास्थ्यका मापदण्ड पालना गर्न छाडिसकेका छौँ । अब फेरि यी मापदण्ड पालनामा संवेदनशील हुनुपर्ने देखिएको छ । त्यसो त सरकारले पनि मापदण्ड पालनाका लागि नागरिकहरूलाई आग्रह गरेर आफ्नो दायित्व पूरा भएको ठान्ने भूल गर्नु हुँदैन । सरकारले पनि आवश्यक पूर्वतयारी बेलैमा गर्नुपर्छ । यहाँ अहिले ने आत्तिइहाल्नुपर्ने अवस्था नभए पनि सर्वसाधारणलाई सचेत बनाउँदै पूर्वाधारको तयारी र सीमाक्षेत्रमा निगरानी गर्ने विषयमा सरकार तदारुकताका साथ सक्रिय हुनुपर्छ । 

खुला सिमाना र मानिसहरूको आउजाउका कारण नेपालमा पनि नयाँ भेरिएन्ट सङ्क्रमणको जोखिम हुने नै छ । त्यसैले यसको रोकथाम एवम् नियन्त्रणका लागि जनसमुदाय सजग र सचेत हुनु आवश्यक छ । यसका साथै तीनै तहका सरकारहरूले आ–आफ्नो स्तरबाट बेलैमा तयारी गर्नु आवश्यक छ ।