_1693980289.gif "#")
धरान । थाइल्याण्डमा हुने अन्तर्राष्ट्रिय कराँते प्रतियोगितामा भाग लिन जाने खेलाडीहरुलाई सोमबार विराटनगरमा विदाई गरिएको छ ।
विराटनगर महानगरपालिकाका मेयर नागेश कोइरालाले थाइल्याण्ड ओपन कराँते डो च्याम्पियनसिपमा सहभागी हुन जाने खेलाडीहरुलाई विदाई गरेका हुन् । कञ्चनबारी कराँते एकेडेमीले सोमबार आयोजना गरेको कार्यक्रममा मेयर कोइरालाले खेलाडीहरु प्रभाकर रानामगर, रोजन खड्का, परशु कुँवर, सुरज कामत, महेश यादव र साहिल गिरीलाई खादा लगाएर विदाई गरे ।
उनले प्रतियोगितामा भाग लिने खेलाडीहरुलाई जितको अग्रिम शुभकामना दिए । उनले भने–‘खेलकुद मुलुकको विकासको मेरुदण्ड हो, खेलकुदले समाज परिवर्तन गर्न महत्वपूर्ण भूमिका खेल्ने बताए ।
खेलकुदका माध्यमबाट समाज परिवर्तन गर्न गर्न सकिने बताउदै उनले भने ‘युवाहरुलाई कुलत र विकृतिबाट सही बाटोमा लगाउन खेलकुद राम्रो माध्यम हो ।’
त्यस्तै विराटनगर ४ का वडाध्यक्ष जितन थापाले शिक्षा र स्वास्थ्य जस्तै खेलकुद पनि समाजको महत्वपूर्ण अंग भएको बताए । खेलकुदले युवाहरुलाई शारीरिक र मानसिक विकासमा समेत महत्वपूर्ण भूमिका खेल्ने वडाध्यक्ष थापाको भनाइ थियो । ‘मानिसको शारीरिक र मानसिक विकासका लागि खेलकुद अपरिहार्य छ, समाजलाई सही बाटोमा अगाडि बढाउन समेत खेलकुदले महत्वपूर्ण भूमिका निर्वाह गरेको हुन्छ ।’ थापाले भने ।
यही अगष्ट १९ देखि २३ तारिखसम्म थाइल्याण्डमा अन्तर्राष्ट्रिय कराँते प्रतियोगिता हुँदैछ । प्रतियोगितामा सहभागी हुन जाने खेलाडीहरुलाई कञ्चनबारी कराँते एकेडेमीले औपचारिक कार्यक्रम गरेर विदाई गरेको हो । कार्यक्रममा एकेडेमीका प्रमुख प्रशिक्षक चन्द्र पराजुली, एकेडेमीका उपाध्यक्ष अर्जुन चुडाललगायतले शुभकामना दिएका थिए ।
