धरान । इलाम चोक बजार नजिकैको टेयाक्सी स्टेण्डमा रहेको शाह माछ पसलमा मरेर सड्न लागेको माछा बेच्न राखेको पाइएको छ । फ्रिजमा राखिएको माछा सड्न लागेको अवस्थामा फेला पारेपछि बरामद गरिएको छ । बरामद गरिएको माछा नष्ट गरिएको छ । अनुगमनकै क्रममा एक किराना पसलमा म्याद गुज्रिएका केही सामान फेला पारेपछि सो सामाग्री समेत नष्ट गरिएको अनुगमनमा संलग्न निरिक्षण अधिकृत यादव राउतले जानकारी दिए । त्यस्तै चोकबजारको ताम्राकार स्वीट्स कर्नरमा अखाद्य वस्तु फेला परेको छ । बुधबार गरिएको अनुगमनका क्रममा चोक बजारमा सञ्चालित स्वीट्स कर्नरमा सडेगलेको तथा अखाद्य वस्तु फेला पारिएका हो । उक्त फेला पारिएको अखाद्य वस्तु अनुगमन टोलीले नस्ट गरेको छ ।
राउतका अनुसार किराना पसल, वधशाला, माछा पसल तथा होटल र फलफुल पसलमा अनुगमन गरिएको थियो । दुईवटा मिठाइ पसल, दुईवटा माछा पसल, दुईवटा मासु पसल, एउटा फलफुल पसल र एउटा किराना पसलमा अनुगमन गरिएको थियो । त्यस्तै अन्य केही पसलहरुमा समेत सामान्य अनुगमन गरेको हो । अखाद्य वस्तु बिक्री गर्ने पसलहरुलाई तत्काल सुधार गर्न चेतावनी दिइएको छ । त्यस्तै केही पसलमा मुल्य सूची नराख्ने गरेको पाइएको छ । व्यवसाय दर्ता नगरी सञ्चालन गर्ने, कर दर्ता लगायतका अनुमति पत्र नराख्ने पसलहरुलाई नियम पालन गर्न निर्देशन दिइएको छ । अनुगमनका क्रममा सुधार गर्न भनिएका पसलमा पुनः यस्तो पाइएका कानुन बमोजिम कारबाही गरिने बताइएको छ । अनुगमनमा जिल्ला प्रशासन कार्यालय, जिल्ला प्रहरी कार्यालय, इलाम नगरपालिका, घरेलु तथा उद्योग कार्यालय लगायतको सहभागिता रहेको थियो ।