-100px_1656309522.gif "#")
धरान । अन्तरपालिका स्तरीय शहीद रामकृष्ण श्रेष्ठ स्मृति महिला फुटबल प्रतियोगिताको उपाधि धनकुटा नगरपालिकाले जितेको छ ।
धनकुटामा शनिबार शरु भएको प्रतियोगिता शहीद रामकृष्ण श्रेष्ठ स्मृति प्रतिष्ठान धनकुटाले आयोजना गरेको थियो ।
मंगलबार भएकोे फाइनलमा धनकुटा नगरपालिकाले चौबिसे गाउँपालिकालाई ३–० गोल अन्तरले पराजित गर्दै उपाधि जितेको हो । विजेता धनकुटा नगरपालिकाले नगद ५० हजार रूपैयाँसँगै कप हात पारेको छ ।
उपविजेता चौबिसे गाउँपालिकाले ३० हजार नगदसहित ट्रफी हात पारेको छ ।
फाइनल खेलको वुमन अफ द म्याच धनकुटा नगरपालिकाकी अनिता लम्जेल घोषित भइन् भने प्रतियोगिताको उत्कृष्ट खेलाडी धनकुटा नगरपालिकाकै तीर्था लिम्बू घोषित भइन् ।
प्रतियोगितामा धनकुटा जिल्लाका ७ वटा स्थानीय तहको सहभागिता रहेको थियो । धनकुटा नगरपालिकाले छथर जोरपाटी गाउँपालिकालाई र चौबिसे गाउँपालिकाले शहीदभूमि गाउँपालिकालाई पराजित गर्दै फाइनल पुगेको आयोजकले जनाएको छ ।
महिलालाई पनि फुटबल खेलमा समावेश गरेर खेलाडी उत्पादन गर्ने मुख्य लक्ष्य रहेको आयोजकको भनाई छ।
