धरान । किराँत धर्मगुरुले पवित्र मनले काम गरिरहे जस्तै नेकपा एमालेले पनि समाजलाई हिंसारहित, शान्त र विकसित बनाउन पूर्वप्रधानमन्त्री तथा नेपाल कम्युनिस्ट पार्टी (एमाले) अध्यक्ष केपी शर्मा ओलीले बताएका छन् ।
इलामको माङसेबुङको लारुम्बामा रहेको किराँत धर्मावलम्बीको पवित्र धार्मिकस्थलमा धर्मगुरु आत्मानन्द लिङ्देनसँग दर्शन–भेट कार्यक्रममा ओलीले हिंसारहित, शान्त र विकसित बनाउने नै नेकपा एमालेको उद्देश्य रहेको बताएका हुन् । धर्मगुरु लिङ्देनसँग दर्शन–भेट गर्न लारुम्बा आएका ओलीले माङसेबुङ क्षेत्रको विकासका लागि एमाले सधैं चिन्तनशील रहेको भन्दै ओलीले ‘गुरुको आशीर्वाद हाम्रा उम्मेदवारले पाउने छन्, त्यसपछि यो क्षेत्रको विकासमा अझ अघि बढ्ने अवसर हामीलाई हुनेछ ।’ ओलीले यो धार्मिकस्थलले मानवजातिको कल्याण, शान्तिको चाहना, न्यायपूर्ण समाज र मानिसलाई दुःखबाट छुटकाराका लागि सकारात्मक काम गरिरहेको भन्दै एमालेको चाहना पनि त्यही भएको बताए । उनले भने, ‘एमालेले पनि मानिसलाई दुुःख, अभावबाट मुक्ति दिन चाहेको हो, शान्ति र विकासको मामलामा एक स्टेप अघि बढ्न चाहेको हो, यी कामका लागि हामीलाई पनि गुरुबाट पक्कै आशीर्वचन प्राप्त हुनेछ ।’
एमाले नेतृत्वको सरकार भएका बेला यस धार्मिकस्थलका लागि पूर्वाधारका काम भएको स्मरण गराउँदै ‘दमकबाट लारुम्बा हुँदै जाने सडकको स्तरोन्नतिको काम गर्दैगर्दा अहिले माई नगरको दानाबारीबाट फेरि यहाँ आइपुग्ने सडकको काम भईरहेको ओलीले बताए । उनले भने, ‘यस क्षेत्रको विकास सन्दर्भमा यही क्षेत्रका प्रतिनिधि सुवासचन्द्र नेम्बाङले पनि मलाई धेरै कुरा भन्नुभएको छ, हामी यहाँका आवश्यकता, समस्या निराकरणमा सदैव प्रयत्नशील छौं ।’ सबै मिलेर यो क्षेत्रको विकासमा लाग्ने प्रतिबद्धता जनाउँदै ओलीले भने, ‘अहिले चुनावका बेला आएकाले कुनै राजनीतिक स्वार्थले आयो कि भन्ने लाग्छ सक्छ, ‘म गुरुको जन्मोत्सव र अरूबेला पनि यहाँ आउँछु, हामी आउँछौं, म गुरुको दर्शन गर्न आएको हुँ ।’