राष्ट्रपति शैक्षिक सुधार कार्यक्रम : सुनसरीमा ६७ विद्यालय छानिए

धरान । राष्ट्रपति शैक्षिक सुधार कार्यक्रम अन्तर्गत सुनसरीका ६७ विद्यालय छानिएका छन् ।

आर्थिक वर्ष २०७८÷७९ मा कार्यक्रम अन्तर्गत कक्षा कोठा निर्माण, सूचना प्रविधि (आइसिटी) कक्षा सञ्चालन र प्रयोगशाला स्थापनाका लागि जिल्लाका १२ पालिकाबाट ६७ विद्यालय छनोटमा परेका हुन् ।

छनौटमा परेका विद्यालयहरुमा २१ वटा विद्यालयमा ४ कोठे भवन, २७ विद्यालयमा आइसीटि कक्षा सञ्चालन, ३ वटा विद्यालयमा ल्याब स्थापना, १६ वटा विद्यालयहरुमा दुई कोठे भवन निर्माणका लागि कुल १२ करोड ४९ लाख ५० हजार रुपैया बजेट विनियोजन भएका छन् ।

आइसिटी कक्षा सञ्चालनार्थ प्रतिविद्यालय छ लाख ५० हजार रुपैया, ल्याबका लागि प्रति विद्यालय १० लाख, दुईकोठे कक्षाकोठा निर्माण गर्न प्रति विद्यालयका लागि १८ लाख र चारकोठे कक्षाकोठाका लागि प्रति विद्यालय ३६ लाख रुपैया विनियोजन गरिएको छ ।

छनौटमा परेको धरान उपमहानगरपालिका १३ विद्यालय मध्ये चार कोठे भवन निर्माणका लागि ८ वटा विद्यालय, आइसीटि कक्षा सञ्चालन गर्न ४ वटा विद्यालय र ल्याब स्थापना गर्न एकवटा विद्यालय छनौट भएका छन् । इटहरीमा परेका ७ विद्यालयहरु मध्ये चार कोठे भवन निर्माणका लागि १, दुई कोठे भवन निमार्णका लागि २ र आइसीटि कक्षा सञ्चालनका लागि ४ विद्यालय छनौटमा परेका छन् ।

त्यसैगरी, बराहक्षेत्रका ८ विद्यालयहरुमध्ये चार कोठे भवन निर्माणका लागि २, दुई कोठे भवन निर्माणका लागि ३ र आइसीटि कक्षा सञ्चालनका लागि ३ विद्यालय छनौटमा परेका छन् । यता रामधुनीका ५ विद्यालयहरुमध्ये चार कोठे भवन निमार्णका लागि १ वटा, दुई कोठे भवन निमार्णका लागि १ वटा र आइसीटि कक्षा सञ्चालनका लागि ३ विद्यालय छनौटमा परेका छन् ।

त्यस्तै, दुहबीका ५ विद्यालय मध्ये चार कोठे भवनका २, दुई कोठे भवनका लागि १ र आइसीटि कक्षा सञ्चालनका लागि २ विद्यालय छनौटमा परेका छन् । इनरुवामा ४ विद्यालयमध्ये चार कोठे भवनका लागि १, दुई कोठे भवनका लागि १ र आइसीटि कक्षा सञ्चालनका लागि २ विद्यालय छनौटमा परेका छन् । बर्जुका ४ विद्यालय मध्ये चार कोठे भवनका लागि १, दुई कोठे भवनका लागि १ र आइसीटि कक्षा सञ्चालनका लागि २ विद्यालय छनौटमा परेका छन् । गढीका २ विद्यालय मध्ये चार कोठे भवनका लागि १, दुई कोठे भवनका लागि १ विद्यालय छनौटमा परेका छन् । त्यस्तै हरीनगरका ६ विद्यालयमध्ये चार कोठे भवनका लागि २, दुई कोठे भवनका लागि १ र आइसीटि कक्षा सञ्चालनका लागि ३ विद्यालय छनौटमा परेका छन् ।

त्यस्तै, भोक्राहका ५ विद्यालयमध्ये चार कोठे भवनका १, दुई कोठे भवनका लागि २ र आइसीटि कक्षा सञ्चालनका लागि २ विद्यालय छनौट भएका छन् । यता देवागञ्जका ३ विद्यालयमध्ये चार कोठे भवनका लागि १, दुई कोठे भवनका लागि १ र ल्याब स्थापनाका लागि १ विद्यालय छनौटमा परेका छन् । कोशी गाउँपालिकाका ५ विद्यालय मध्ये दुई कोठे भवनका लागि २, आइसीटि कक्षा सञ्चालनका लागि २ र ल्याब स्थापनाका लागि १ वटा विद्यालय छनौटमा परेका छन् ।

कक्षाकोठका अभावमा बहिर बसेर अध्ययन गरिरहेका विद्यार्थिहरुलाई यस कार्यक्रमले ठुलो सहयोग पुग्ने विश्वास लिइएको छ । शैक्षिक संस्थाको स्तरोन्नती गर्न आएका राष्ट्रिय कार्यक्रमहरुले विद्यार्थीहरुको सिकाइ उपल्ब्धीमा वृद्धि हुनुका साथै विद्यालय प्रति विद्यार्थीहरुको आकर्षण बढ्ने चन्द्र संस्कृत माध्यमिक विद्यालयका प्रधानाध्यापक अजय शाही बताउँछन् ।