धरान । धरान डे को अवसरमा धरान आदर्श माध्यमिक विद्यालयले मंगलबार १० औँ मिनि म्याराथुन प्रतियोगिता सम्पन्न गरेको छ ।
विद्यालयको सप्ताहब्यापी खेलकुद पुष २५ गतेबाट सुरू हुँने भए पनि धरान डेको अवसरमा मिनि म्याराथुन प्रतियोगिता मंगलबार नै आयोजना गरिएको विद्यालयले जनाएको छ । म्याराथनमा छात्र तर्फ कक्षा १२ मा अध्ययनरत बिजनेस संकायका रिजन श्रेष्ठ र छात्रा तर्फ कक्षा ११ की मेनेजमेन्ट संकायमा अध्ययनरत आयुशा लिम्बू पहिलो भएका छन् ।
त्यस्तैगरी छात्र तर्फ कक्षा ११ मा अध्ययनरत एच.एमका सुदिप राई दोस्रो, कक्षा १२ मा अध्ययनरत साइन्स संकायका सन्तोस राई तेस्रो र कक्षा १२ का बिजनेस संकायमा अध्ययनरत पारुहाङ्ग राई चौथो भएका छन् । छात्रा तर्फ कक्षा १२ मा अध्ययनरत साइन्स संकायका लिला चौधरी दोस्रो, कक्षा ११ मा अध्ययनरत साइन्स संकायका एन्जिला चौवान तेस्रो र साइन्स संकायको कक्षा ११ का दिर्सना बस्नेत चौथो भएका छन् ।
विद्यालयका प्रधानाध्यापक लोकेन्द्र श्रेष्ठका अनुसार पठनपाठनसँगै विद्यार्थीहरुलाई अन्य अतिरिक्त क्रियाकलापमा जागरुप गराउन खेलकुद प्रतियोगिताको आयोजना गरिएको हो ।सप्ताहब्यापी कार्यक्रम अन्तर्गत फुटबल, टेबलटेनिस, बास्केटबल, ब्यडमिन्टन लगायत १२ खेलहरू हुने उनले जानकारी दिए ।