विराटनगर । प्रदेश १ मा पछिल्ला केही दिनयता कोरोना संक्रमण केही मत्थर भएजस्तो देखिएपनि मृत्यु दर भने घट्न सकेको छैन ।
कारोनाको पहिलो लहर अन्त्य हुने बेला मृत्यु दरमा कमी आएको थियो । तर, दोस्रो संक्रमण चरममा पुगेको भन्ने चिकित्सक तथा विज्ञले बताइरहँदा प्रदेशमा कोरोनाकै कारण हुने मृत्युमा भने कमी आएको छैन । प्रदेश १ मा दैनिक औसत पाँच जनाको कोरोनाकै कारण मृत्यु भई रहेको छ ।
पछिल्लो एक सताको तथ्यांक हेर्दा कोरोना संक्रमित थपिने क्रम दैनिक पाँच सयभन्दा तल झरेपनि मृत्यु दरमा भने कमी आउन सकेको छैन । बुधबार कोरोनाका कारण प्रदेशमा चार महिला र एक पुरुषले ज्यान गुमाए । ४ सय ७९ संक्रमित थपिँदा २ सय ४६ संक्रमणमुक्त बने ।
प्रदेश राजधानी विराटनगरमा पछिल्ला केही दिन ५० भन्दा कम संक्रमित थपिने गरेका थिए । तर, यो साता भने दैनिक ५० भन्दा बढी संक्रमित थपिन थालेका छन् । यसअघि हटस्पट बनेका धरान, इटहरी, दमक र विर्तामोडमा भने संक्रमण केही मत्थर भई संक्रमित थपिने क्रम घटेको छ ।
मंगलबार ३ सय ९० जना संक्रमित थपिए भने दुई पुरुषको मृत्यु भयो । त्यो दिन ३ सय २८ जना संक्रमण मक्त बने । सोमबार ३ सय ६६ जना नयाँ संक्रमित थपिए । ४सय १२ संक्रमणमुक्त भए ।
पाँच जनाको कोरोनाका कारण मृत्यु भयो । सामाजिक विकास मन्त्रालयका अनुसार आइतबार २सय ३७ जना नयाँ संक्रमित थपिए । ३ सय ४ जना संक्रमण मुक्त भए भने पाँच जनाको मृत्यु भयो । शनिबार ३ सय ९० संक्रमित थपिए । ४ सय २५ संक्रमण मुक्त भए ६ जनाको कोरोनाबाट मृत्यु हुन पुग्यो ।