प्रतिष्ठानको ताला खोल्न औषधी व्यवसायीको माग

धरान/ धरानस्थित बीपी कोइराला स्वास्थ्य विज्ञान प्रतिष्ठानमा लामो समयदेखि लगाइएको ताला खोल्नुपर्ने औषधि व्यवसायीहरुले माग गरेका छन् ।
नेपाल औषधि व्यवसायी संघ इकाई कमिटी धरानले सोमबार प्रेस विज्ञप्ती जारी गर्दै प्रतिष्ठानको सेवा सञ्चालनमा समस्या भएको भन्दै ताला खोल्न उनीहरुले माग गरेका हुन् ।
इकाईका धरानका संयोजक मचिन्द्र लिम्बूद्वारा हस्ताक्षरित विज्ञप्तीमा प्रतिष्ठानको पदाधिकारीहरूको कार्यकक्षमा ७६ दिनदेखि तालाबन्दीले प्रतिष्ठान सेवामा समस्या भएको जनाएको छ ।

 

विश्वव्यापी कोरोना संक्रमणका अवस्थामा जनमानसमा स्वास्थ्य जस्तो संवेदनशील क्षेत्रको गलत सूचना प्रवाह भएकोले अविलम्ब ताला खोली सहज वातावरण बनाउन माग गरेको छ ।
विज्ञप्तीमा लेखिएको छ, ‘विगत लामो समय देखि शुद्धिकरणको नाममा प्रतिष्ठानमा संचालित आन्दोलनको कारण प्रतिष्ठानमा आश्रित व्यवसायहरुमा नकरात्मक प्रभाव पर्न गई व्यवसायहरु नै बन्द गर्नुपर्ने स्थिती सृजना भएको छ, प्रतिष्ठानको विकृति, विसंगती, अनियमितता र उत्श्रृखल कार्यले भोलि धरानकै भविष्य के हुने भन्ने विषय पनि टडकारोमा रुपमा उठन थालिसकेको छ ।’

विज्ञप्ती मार्फत प्रतिष्ठानको तालाबन्दी खोलि प्रतिष्ठान संचालनका व्यवस्था मिलाउन पहल गरिदिन धरान उपमहानगरपालिकाका मेयर सहित वडाअध्यक्षहरुलाई पनि अनुरोध गरेको छ ।