धरान । वीपी कोइराला स्वास्थ्य विज्ञान प्रतिष्ठानको शुद्धिकरण अभियानमा २८ दिन देखि आन्दोलनरत संयुक्त संघर्ष समितीले धरानका वडाअध्यक्षहरु सँग छलफल गरेको छ ।
समितीले मंगलबार आन्दोलनको विषयमा वडाअध्यक्षहरुको धारणा बुझ्न छलफल गरेको हो । २० वटै वडाका वडाअध्यक्षहरुलाई बोलाए पनि ३ वटा वडाका अध्यक्षहरु मात्रै उपस्थित भएका थिए ।
सहभागि वडाअध्यक्षहरुले प्रतिष्ठानमा विगत चार हप्तादेखि जारी आन्दोलनलाई समर्थन जनाउँदै सहयोग गर्ने प्रतिबद्धता जनाए । प्रतिष्ठानलाई सुधार गर्न आवश्यक रहेको बताउँदै सहभागि वडाअध्यक्षहरुले सक्दो सहयोग गर्ने प्रतिबद्धता जनाएको समितीका सदस्य तथा जुनियर रेसिडेन्ट वेलफेयर सोसाइटीका उपाध्यक्ष डा. पदम नेपालीले बताए । उनका अनुसार छलफलमा वडा नम्बर १२ का वडाअध्यक्ष टंक राई, सदस्य ब्रमज्ञ भट्टराई, वडा नम्बर ९ का वडाअध्यक्ष रत्न कटुवाल, १० का अध्यक्ष श्री सुब्बा, १८ की सदस्य जमुना त्रिखत्री उपस्थित भएका थिए ।
असार मसान्त भएकाले वडाअध्यक्षले उपस्थित हुन नसकेको जानकारी गराएको उनले बताए । समितीले उपस्थित जनप्रतिनिधीहरुलाई आफ्ना मागहरुको विषयमा जानकारी गराउँदै आन्दोलनलाई प्रभावकारी बनाउन ऐक्यबद्धता जनाउन आग्रह गरेका थिए ।